حچاية التنگال ٤٩٣

                                             

                             د.سعد العبيدي

حچاية التنگال ٤٩٣

 أبو غايب گضة حياته بالسياسة، ومن الخمسينات بحزب البعث حتى وصل بداية الستينات عضو قيادة قطرية. من صار الانقلاب مال سنة ١٩٦٨ تعنوله ربعه البعثيين للبيت وسجنوه وعذبوه عذاب مو بانصاف. وره ما طلعوه من السجن سنة ١٩٧١، گال إذا ربعي هيچ يهينوني، لعد بالناس الباقين شيسون، والله المكان الي بيه يحكمون ما أبقه بيه لو يشعلولي العشرة شمع، والتوبه الـ چان أشوفك يا العراق. سنة ٢٠٠٤ سأل أحد عنده روحه لبغداد؟.
جاوبه حسين إي عندي، شتؤمر؟.
وديلي هاي الوكالة للمحامي عدنا بستان وبيوت بالناصرية، أخوتي كلهم ماتوا خلينه انبيعها، وبلكت تجيني چم فلس أحسِنْ وضعي الي دا تشوفة بائس... ليش انتَ ماتروح؟... المحامي گلي لا تجي، تره يعلسوك... محاميك تعرفهَ زين؟.
أبوه صَدِيقي من الابتدائية، ومن عائلة معروفة بالناصرية وينحلف براسه.
راحت أيام واجتي أيام وكل ما يسألون أبو غايب وين صارت بيعة البستان، يگول بعد. آخر گعدة بداية سنة ٢٠١٧ هم سئلوه إشصار من البيع، جر حسره وگال المحامي طابگ وِيهَ ابن أخوي الي دايس بالخونه وهذا ميخلي أحد يتگرب للبستان، وتاليها گتله اخذ حصتي بنص السعر گال عمي حرام خلينهَ نبيع. وتاليها طلع متطوع بوحده من المليشيات وناطيه رتبة عميد وخاصيلك المنطقهَ، بعد وين أكو أحد يهوب على ملك هو گاعد بيه. شتگولون شسوي واني وحيد وعمري صار ٨٥ سنة.
ما ينرادلها گول. الجماعة ينتظرون موتك حتى يدوسون بالخونة.
أدري بَسْ شَسَوّي. شُوفلَكْ واحد بغير مليشيا ناطيه رتبة لواء ياخذلك حقك.

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

1005 زائر، ولايوجد أعضاء داخل الموقع