الگاردينيا - مجلة ثقافية عامة - قبل واليوم !! جدو صاير ابن بطوطة !!!!

قبل واليوم !! جدو صاير ابن بطوطة !!!!

                                            

                         سيف الدين الألوسي

قبل واليوم !! جدو صاير ابن بطوطة !!!!

     

على ما اتذكر قبل كانت صورة الجد روعة ،، بيت الجد دائما مفتوح لابناؤه وبناته واحفاده وزيارته اسبوعيا ضرورة للجميع من ابناء وبنات ونسبان وچناين واحفاد،، ومراسم العيد في بيت الجد من احلى المراسم ،، وحتى اذا توفي الجد فيبقى البيت مفتوح وتديره البيبي الكبيرة وكأنه موجود !!!
بفضل لعبة الامم وصدام واميركا والشكولات الزفرة التي طيحت حظ العراق سابقا ولاحقا وهجولت العالم !! ،، اليوم نرى بيت الجد متروك والبيبي حايرة بزمانها ،، الابناء والبنات والاحفاد متهجولين ،، كلمن جوه نجمة ،،، حايرين بزمانهم ،، الاحفاد حايرين شيحچون بأي لغة ،، ؟؟ جدو حاير ،، ؟؟؟ بدل ما يغير كل ساعة القنفة اللي ينجطل عليها ،، وبگبة الهول والتلفزيون !!! گام يگمز بين المطارات ،، وهو تعبان وكل قلاقيله واگعه !!!! وليرى الاولاد والاحفاد !!!
گبل جدو يتونس كلش ، من يباتون يمه الاحفاد واكبر ونسه من يصير عصبي ويكلهم سنطة ،، خللي ننام !!!! سنطة بلية لغوة ،، سنطة بلية هوسة !!!
خلي ننچب ننهمد !!
وبيبي تؤيده ،، ناموا تره رح يگوم يبسطنه !!! تره جدو !!! مخبل !!!
هسه الاحفاد يگلون لجدو ، نام جدو ،، تره تأخرت وعدنه باجر مدرسة ،، ودوام !!
رح نسقط من وراك !!!!!!!!!
احفادي تعلموا چم چلمة مني وهم في الغربة ،، وكلها كلمات مفيدة واستراتيجية بغدادية عراقية !! ،،، منها قزلقرط ،، زقنبوت ،، بلية لغوة ،، ..... ،،، أثول ،،، والاهم دماغسز التي تستعمل كثيرا !!!
الله يحفظ الناس جميعا واين ما كانوا ،،، ويطيح حظ كل من ساهم بهجولة المجتمعات ومهما كانوا !!!
ويم حسين چنه ، بواحد ،،، صرنه بالفين !
تحياتي للجميع

الأبراج وتفسير الأحلام

المتواجدون حاليا

445 زائر، ولايوجد أعضاء داخل الموقع