الگاردينيا - مجلة ثقافية عامة - بريسم ،، وخلي بالك من زوزو !!! من ايام نادي المنصور !!!

بريسم ،، وخلي بالك من زوزو !!! من ايام نادي المنصور !!!

                                      

                       سيف الدين الألوسي

      

بريسم ،، وخلي بالك من زوزو !!! من ايام نادي المنصور !!!

في نادي المنصور كان هنالك دورين للسينما في ايام الاحد وثلاثة ادوار ايام الجمع منها دور بالرابعة والنصف للاشبال !! ودور التسعة ايام الاربعاء ،، وكان ذلك منهج السينما الشتوي ،،، في الصيف والسينما الصيفي بالحديقة ،، تكون دورين يوم الاحد ودور يوم الاثنين للشباب ودور يوم الاربعاء ودورين يوم الجمعة ،، ٧،٣٠ و٩،٣٠ ،،،....

             

   في احد ايام الشتاء وفي دور السبعة ونص من يوم الاحد ، كان يعرض فيلم خلي بالك من زوزو لسعاد حسني ،، ونادرا ما يعرض فيلم عربي في نادي المنصور !!
السنة ١٩٧٥ شتاءا وفي العطلة الربيعية ،،، نحن الشباب في ذلك الوقت والذي كان الغد لنا !! شياب اليوم ،، ذهبنا جموعا وقبائل الى الفيلم ورغم كوننا لا نتفرج لا زوزو ولا افلام استعراضية عربية ،،، السبب وجيه جدا !!
معظم بنات النادي من الفئات العمرية ١٥ - ٢٥ سنة حاضرات للتفرج على معبود الفتيات حسين فهمي وهو فاتح زيكه كونه صرمپاره مصري وعلى سعاد حسني !!
كصينا بطايق السينما نحن مجموعة فيترية وحدادة صدر نادي المنصور ، وكعدنا في سره بالسينما ، محاط بكل الحسناوات مال هذاك الوكت ،، من كل الجهات وفي وسط السينما ،،

   

وكان المسؤول عن قاطعنا العظيم بريسم ،، بريسم : اربعة فريدة وببسي وخمسة چبس !!! بريسم : هايه الفريدة حارة !!! جيبلنا باردة مجورشة !!!
بريسم المسكين انثول !!!
كان في السره الذي امامنا سرب من عشرة اناث من حسناواتنا الباسلات !! وطبعا احنه في غاية الاهتمام بادامة السرب وليس التفرج على الفيلم !! ثلاثة من مجموع عشرة بنات بالسرب يبدي اسمهم بحرف الزاء !!! وكل ميفوت بريسم محمل غراض للبنات والممشى ضيق ،، نصيح ، بريسم خلي بالك من زوزو !!! وهمه يضحكون واحنه نضحك بخجل منقطع النظير !!! خجولين مو بيدنه !!!
وره الفترة او الاستراحة ،، وفي الجزء الثاني من الفيلم ،، جابلنا بريسم ثلاثة بطاله فريدة ،، ومعاها ستة مواعين كباب واسكالوب وببسي وسفن للبنات وخالها كلها، بصينية وحدة وشي فوك شي !!
ديجيب البيرة ،، گناله ،عيب ميصير ،، ليديز فيرست !! راح على سره البنات والصينية مقبطة فريدة وببسي وسفن ومواعين كباب واسكالوب ،، وبده ينزل الاوردرات على سره البنات بالظلمة مال الفيلم وهو مديفرزن بالضبط ، الاسكالوب والكباب ،، ووحدة تكول اني سفن وكباب واللخ اني اسكالوب وببسي ،، ثبروه ،، واحنه من يمنه بريسم ،، دير بالك من زوزو لتطيهم بيرة محل الببسي ،،
هناك ، وانثبر ثبرة زينه بريسم وعثر بالميز ووكعت الصينية وتكسرت بطالة الفريدة والببسي والسفن ومواعين الاسكالوب والكباب صار طشارها فوك البنات والزوزوات ،، واحنه نصيح الله الله الله !!! ،، خو محد تأذى ،،. المهم هدوم البنات صارت تشريب مال بيرة وببسي وسفن ودهن مال كباب واسكالوب !! ترزل بريسم خطية !!! وانسحب معظم السرب الى تواليتات النساء لغسل دبك الببسي والبيرة والسفن ،، وطلع خللي بالك من زوزو زقنبوت ،، وكلها من وره حسين فهمي !!
احنه سوسبنه وطلعنا من السينما ، طلبا لنجدة بريسم من قبل قوات طوارئ نادي المنصور بقيادة مكو والذي لط بقية وفضايل بطلين بيرة لم تنكسر ، بالفاجعة الاليمة !!
وخللي بالك من زوزو !!!
تحياتي للجميع .

  

الأبراج وتفسير الأحلام

المتواجدون حاليا

341 زائر، ولايوجد أعضاء داخل الموقع