الگاردينيا - مجلة ثقافية عامة - لمبرغيني ، فيراري ، موسكوڤيج !!! منو رح يغلب !!!

لمبرغيني ، فيراري ، موسكوڤيج !!! منو رح يغلب !!!

                                                   

                         سيف الدين الألوسي

        

   لمبرغيني ، فيراري ، موسكوڤيج !!! منو رح يغلب !!!

   

في أحدى السنين كان هناك موظف بسيط على گد حاله ،، مرته تنق براسه ليل نهار نريد سيارة ،، قابل الناس احسن منا !! لملم چم فلس ودفع ١٥٠ دينار بالشركة العامة للسيارات كدفعة اولى لسيارة موسكوڤيج موديل ١٩٧٤ والتي هنالك اقوال بأنها مقايضة مع قنادر ونعل باتا !! ،،، بعد سنتين جتي السيارة ،، وكمل بقية الفلوس ،،، وخيروه موظفي الشركة بالالوان الموجودة ،، الابيض كله محجوز للواسطات !! ،، الاحمر خلصوا الربع من أهل اليسار الحالمين بلينين وماركس وستالين ايام الجبهة الوطنية التقدمية !! ،، بقه عدنه ازرگ كاروكي وخردلي خرائي ،، شتريد !!!

گاللهم اريد ازرك گاروكي وكان معجب بتحية كاريوكا !!!
استلم الموسكوڤيج الزرگه كاروكي وعدل للبيت ،،، ودك هورنات ،، تيت ، تيت وهورن الموسكوڤيج مطبگ حسه من الشركة ،، وصل للبيت ،، ومرته ذبحت دجاجة ورشت ويهلية جكليت ومصقول وگعدت بالصدر ، دياخذون فرة بالموسكوفيج مثل جيمس دين ومارلين مونرو ، في شوارع بغداد !!!
بقت الموسكوڤيج چم شهر وبريكاتها گامت تنعفص ،،، والهورن يعتعت أمر من حظي !!!!!! وهو رايح جاي للوظيفة ومسويلها چادر داير مدايره كلبدون خوفا من حرارة تموز والحر !!!
فد يوم بآب اللهاب وگفت الموسكوڤيج بنص الشارع وزوعت كل المي مالتها وگام الووتر پمپ !!! دفعها الرجال الى يمين الشارع وگام يأشر للسيارات بلگت أبن حمولة يجره وهو يمسح العرگ بچفية مسينة مليانه ....!!! محد وگف !!!
وهو يهفي من الحر وينعل ساعة السودة طبگ واحد ابو لمبرغيني ١٢ سلندر شاعل تكييف ،، وخال ريحة تعط سبع محاليل !!! گاله خير ؟ جاوبه ابو الموسكوفيج ،، الووتر پمپ گام وزاع الاكو و الماكو وعطب الگازكيت !!! بلكت تجرني للشيخ معروف واذا صعبة جرني للميدان حتى اخذ باص وارجع للبيت !! ابو اللمبرغيني انقهر وگاله رح اوديك للشيخ معروف يم الفيتر ،، ونزل حبل لاستيك ايطالي اصلي حتى يجر الموسكوفيج لأن ابو الموسكوفيج عنده حبل مال هدوم أبو أبوه مستلك مگطع !!!
المهم ربطوا الحبل وحرك ابو اللمبرغيني وشغل التكييييييف ،، وابو المسكوڤيج فاتح الجامات ويهفي ! جره لابو الموسكوڤيج الكاروكي ،، وبعد شوية وكفوا بالترافك للاشارة الحمرة وچانت محترمة بهذاك الوكت ،،، اجه ابو فراري همين ١٢ سلندر طبك بصف ابو اللمبرغيني وهمين شاعل تكييف وخال ريحة لكريستيان ديور همين تعط !!! وفاتح بكرة مال طروب وحمد جمال بعلو حسها !!! وبقه يكفخ على البنزين دي يوازي ابو اللمبرغيني !!!
انفتحت الاشارة الخضرة ،، وشلع المبردغ ابو الفراري وشحطها للتايرات ،، ابو اللمبرغيني گال اشتعل ابوك ،، همين جابها بشلعة وشحطه وهو چان فاتح بكره مال فهد بلان مع التكييف !!! وجر ابو الموسكوڤيج وراه وهو مفتح الجامات ويسمع اذاعة صوت الجماهير اغنية عزيزة الگاع !!!! المهم ابو الفراراي ،١٠٠، ١٢٠ ، ١٤٠ ، ووراه ابو اللمبرغيني ،، ومن وصل الگيج لابو الموسكوفيج ١٤٠ كم / ساعة ،، طك الدشبول وفز الرجال من الطگه ،، وگبت ريحة عطاب ،، فغمى عليه ووگع على الاستيرن والهورن ودك پيب حسه مطبگ !!! وصلوا الى سرعة ٢٥٠ كم ،، واكف شرطي مرور اثول شارب لبن اربيل بالحر ومطفي !! ،، ضربوا الترفك لايت ،، الشرطي ملحك ياخذ الارقام مال السيارات !!
الشرطي خابر المفوض اللي بالاشارة اللي وراه وچان عنده ماطور ام زد !!!
گاله سيدي فدوة ،، اكو فيراري ذهبية وراها لمبرغيني ماروني ،، وراهم موسكوڤيج كاروكي ديدك الهم هورن مده ينطوا درب !!! بلكت تلحگهم بال ام زد وتطيح حظهم هل السرسرية !!!
وهسه حسبتنه مثل حسبة ابو الموسكوفيج والام زد بلكت يغلبون اهل الفراري واللمبرغيني بالسباق ،،،،،،،. العفو بالانتخابات ،،، الووتر بمب گام و الطابوگ نام والشگنگ گام !!!!!!!!!!!
كل المحبة للجميع مع تحيات وكلاء لمبرغيني وفراري واوستن مارتن وكورڤيت وووو ولوريات ابو ردين!!!!

الأبراج وتفسير الأحلام

المتواجدون حاليا

282 زائر، ولايوجد أعضاء داخل الموقع