الگاردينيا - مجلة ثقافية عامة - سوالف من بغداد قديما !!!!

سوالف من بغداد قديما !!!!

                                               

                       سيف الدين الألوسي

       

          سوالف من بغداد قديما !!!!

في بداية السبعينيات وقبل ان تصدر اجازتي للسوق سنة ١٩٧٤ ،، كنت أخذ سيارة والدي الشوفرالامبالا ٦٥ الزرقاء ،، للغسل والتشحيم في كراج ابو خاطر واعتقد هو لبناني !! او كراج الخيام في السنك !!! كان دهن السيارات العراقي يعلب في قواطي تنك سعة غالون وارباع الغالون ، والقواطي لونها احمر ومن احسن انواع الدهون في الشرق الاوسط ، كان ينتج في درجات حسب الكثافة ، ففي الصيف درجة ٤٠ او ٥٠ ( ٥٠ يستعمل للديزل ) ، وفي الشتاء درجة ٣٠ ويوجد درجة ٢٠ لغسل المحرك !،،،،،،، عندما تخرج السيارة من احد هذين الكراجين ، تطلع چنها عروس من النظافة ،،، فكنت استغل الموقف واخذلي فرة في بغداد !!! قد لا يعلم البعض بأن هذه الدهون والمنتجات العراقية كانت تهرب الى الاردن وسوريا والكويت والسعودية لجودتها !!!!!!! 

كانت كراجات الغسل والتشحيم تربط كارتات مدورة بخيوط في ذراع الستيرن ، مسجلة في هذا الكارت ، عدد الكيلومترات عند تبديل الدهن ، وتبديل السي اويل والتشحيم ، وحتى يعرف صاحب السيارة الموعد القادم للادامة !!!
في احد المرات اتت امرأة تسوق سيارة أوبل كاديت صغيرة الى كراج ابو خاطر ،، لون سيارتها اخضر فاتح ، جلست تشرب الشاي في منطقة الاستراحة وهي عبارة عن غرفة منفصلة و لحين انتهاء غسل وتشحيم سيارتها ،،،، تعرفت عليها وكلتلها اسمي ، ودك سوالف وعرفت انها مدرسة في احد مدارس البنات ( راهبات التقدمة ) ،،، سألتها عن بنية ومستواها الدراسي !!! وكلتلها هايه كرايبي !!!! اجابتني ،،، هذا الحجي مشي على غيري شلون كرايبك واني اعرفكم زين !!!! ، هاي الكاعد تسأل عليها اكبر ثولة ودماغسز !!!! وراحت للسيارة وجلبت اوراق الامتحان ودفتر الدرجات ،،، وكالتلي باوع ،ماخذه بالخمسين !!!!! كلتلها ست ،،، فدوه الخاطري فد جم درجة لخاطر ابو خاطر مو لخاطري ،،،،،،، سويها ستين !!!!! خربت من الضحك وكالت هاي لخاطرك ستين !!! صحت العامل كتله مشي الست كبلي واريدك تغسل سيارتها غسلة بعد سنة متتوسخ !!! رأيتها بعد سنوات في نادي الهندية وذكرتها بالقصة ،، گالت اللي سألت عليها تزوجت وسافرت !!! ،،، رحمها تعالى ان كانت متوفية واعطاها طول العمر اذا كانت لا تزال عايشة واكيد هسه هاجرت !!! ،،،،،،،،،،،، مع الاسف نسيت اسمها !!!
سيدات ومربيات الزمن الجميل !!
ولا اتكلم عن الفرق بين مدارس الامس واليوم !!! خلوها سنطه !!!
تحياتي للجميع .

الأبراج وتفسير الأحلام

المتواجدون حاليا

522 زائر، ولايوجد أعضاء داخل الموقع