نادي الكلية وايام ضيم وقهر وليل وسهر !!!!!

                                              

                      سيف الدين الألوسي

       


       نادي الكلية وايام ضيم وقهر وليل وسهر !!!!!

ام كلثوم الطب المشافي للاحبة ،عبد الحليم محبوب البنات والنازكين المحبين العاطفيين الحالمين !! ،، فريد رب النضال السلبي وحتى لو يكون ايجابيا يسوي سلبيا ويخللي الحبيبة تشگ هدومها من القهر والعوي ،، واذا مگضتها دگ ولطم على حظها الاغبر !!!!!....فيروز حبيبة الجميع !! تسمع اغانيها الصبح ، تتريك نص كيلو كيمر وشيشة عسل واربع گرص خبز !! وخصوصا اذا اللي المگابلها تفتح النفس ووجها يضحك مثل الگمر وحلوة وعيونها بعيونك مثل سباق فورملا وان !
في السبيعينيات كنا نسمع فيروز صباحا بالطريق الى الكلية ،، ولكوني ساكنا بالكرخ فاطلع من وگت بسبب الازدحام بالشالجية والجسر الحديدي !!! في الطريق المؤدي الى الكلية لا تشعر بوقت ولا ملل !! لوجود حسناوات الكرخ داير حبل من كل الكليات لجامعة بغداد وقبل نقلها الى الجادرية !! وكذلك القماش الزين من حسناوات المستنصرية !! وكذلك وجود تكسيات للموظفين والموظفات ووجود سيارة رئيس اركان الجيش الغير مبتسم دوما الفريق اول ركن المرحوم عبد الجبار شنشل ! الڤولفو ٢٦٤ الخاكي وهو يجلس بجنب السائق !! ،،، وكذلك سيارات وزراء من نوع سيتروين سوداء وغيرها من ڤولفو بدون مرسيديسات !!! وقاضي بغداد الاول المرحوم عبد القادر ابراهيم في سيارة رينو ١٦ سمائي وهو جالس بجنب السائق وعميد كلية الطب المرحوم د تحسين معلة في سيارة رينو ١٦ زيتوني وه بجنب السائق ايضا !! الجميع حماية ني هي !! يعني بدون حماية وبطرك السايق !!!!!!!
كان لدينا أستاذ ذو شخصية نادرة وهو آتي توا من أميركا وأستاذ الكهرو في الكلية ولديه مرسيديس ٢٨٠ اس نيلي دعاميات اميركا موديل ٧٤ ،،، يقبط سيارته من طالبات المستنصرية وحقا لوجه الله ،، فلا انبل منه استاذ فهما وعلما ، واصبح رئيسا للقسم ومن ثم رجع هاجا الى اميركا للمشاكل التي فعلوها له وهو د استاذ ع العاني !!! لك عيني نجحت بالقدرة عندي !!
عند الرجوع والكل مغفية وبعد الظهر ، او العصر او المغرب ،، ترى كل جمال الصباح قد تفرق ،، مثل فصيل جنود غير مسلحين في وحدة فعالة !!! فالبنات مغفيات بالتكسي وكل الزينة او الميكب طاير !! وانت فاتح مودي بلوز وايتس ان وايت ساتين وصافن على زمانك !! وترى زميلتك في الكلية خاله وردة روز يابسة بالليڤكس وتنتظر الحب ،، وهي تسمع عبد الحليم وفي يوم ،، وحبك نار !!! والحب حاير ديقدم على مؤسسة الصناعات الفنية الجديدة !! وهو يقول لها انطيني مفكه !! وهو يسمع فريد وهو يغني بعد مماته !! ،، تقدم واحنه وياك اثنين !!!! وللحب ذكريات !!
هسه الكل متونسين وخصوصا ابو زلاجة للثلج جنان في بلاد الكفار الزنادقة !
اما انا فأحاول اعادة التراث وامشي سيارات موديلات قديمة على جسر الصرافية والبس الحجيات والحجاج ووو زي موحد ، والتكت بلاش مع الاحفاد !! وأخللي مزيقة حبيتك بالصيف ، حبيتك بالشتي للرفيقة الخالدة ام المناضلين فيروز !!!
ونفرين كباب من الجنابي لفيروز !!!
سعادة تسوى ستانفورد وهارفرد مليون مرة بالنسبة لي انا العبد الفقير ولليوم !!!
وليست الحياة ! فقط دراسة ومال ونجاح وبعدين بالگبور ،، !!!!! فالحياة ذكريات وايام حلوة !!
ودمتم للنضال مع كل المحبة للجميع .

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

772 زائر، ولايوجد أعضاء داخل الموقع