الگاردينيا - مجلة ثقافية عامة - مراحل العمر !!!

مراحل العمر !!!

                                            


                      سيف الدين الألوسي

مراحل العمر !!!

في الروضة ،، تبجي من تروح للمدرسة !!!
في الاول الابتدائي ،، تلتهي بتعلم دار ودور وزورق رزاق مقلوب !! وفد كفخة ودماغسز !!!!
في السادس ابتدائي ،، دراسة ومحاولة جلب معدل للدخول الى مدرسة قوية واول تجربة لهوية البكلوريا وهيبتها وزيارة المدرسة البديلة قبل يوم لمعرفة محل الجلوس في الامتحان !!!!!!!!!!
في الثالث متوسط ،، دك رياضة ورومانسيات وتجربة الجگاير واول نفس تشعر بدوخة !!! ومجلات وصور فوتغرافية غير مؤدبة تحولت الى سي ديات في زمن الابناء !!! ،،، وبداية الحرشة ، وزيان اللحية بالمكلوبي حتى تطلع اسرع وتثخن !!!! وحبيات مال زعاطيط !!!
في السادس اعدادي ،،، الوقت ضيق بين الدراسة والرياضة والبنات والتلفونات ،، وعطلة اربعين يوما قبل البكلوريا ( مثل النفسة ) ،، وتطويل اللحى وكأنه لا يوجد وقت لزيان اللحية ،،، ودك درخ للمتنبي وعلى اهل العزم ، والشريف الرضي وكم صاحب كالرمح زاغت كعوبه والبوصيري ،، ودرخ كتاب الحيوان الدليل والفرق بين الكرايبلم والكلاسبر والحمامة والارنب والغضروفيات وووو الكيمياء العضوية في الفصل الرابع والذي كنت متمكنا منها ،، وبعدين بيبيتك تتوفى ليلة امتحان العربي يوم ٣١ ايار وينگلب البيت سبايه ،، وبعدين يعكس الچانص وتاخد ٥٠ بالعربي و٥١ بالحيوان وتجيب ٧٤ معدل ،، وينكسر واهسك !!!! وتضيع فرصة تقرر كل حياتك !!!
في الكلية،،، حياة جميلة وعلاقات وحذر من الحزبيين ( مو كلهم !! ) ،، وسوالف مكسرة وسهر يومي واسكنجبيل وسفرات ،، واصدقاء اضافيين ،، وكتب معنونة الى التجنيد باستمرار الدراسة للتأجيل او السفر ،،، وسيارة فيها كل المستلزمات الضرورية من كاسيتات وريحة بالچكمچة يم الاجازة والسنوية ، وحسب متطلبات المرحلة !!!! وغيرها من امور مثل نص بطل او قوطية باقية بصف تاير السپير !!!
بعد التخرج ،،،،،، السوق الى ك ض ح من التجنيد ومن ثم التوزيع على الصنوف حسب الشهادات ،، ومن ثم بداية الحياة الزوجية بالخطبة وگطعان المهر وجفافي المهر والقاعة والنيشان والبدلات ،، وتعال وروح للخياطة بعد دوام العسكرية لعمل البراوة وهلم جرا !!! ومن ثم التحضير للزواج ،، والقاعة والمطربين ولو تجيب وردة الجزائرية وصباح والمقدم الركن هاني شاكر ويوسف عمر ،، يطلعون النسوان !! شحال مغنيين ، ليش مجابوا ام كلثوم وفريد وعبد الحليم من الگبور !!! الاكل شوية بارد !!! اشدعوه العريس والعروس فرحانين !!!
بعد الزواج ،،،،، عندك اطفال والحرب والشهداء وانت عايش على اعصابك ،، تسريح ني هي بالهندي ، يعني ماكو !!! الكآبة صاعدة لابو موزة ، تجي مرات ابنك الثاني يصفن بوجهك وميعرفك وعمره سبعة اشهر !!! حاير بزمانك وبعائلتك !! ثمانية اعوام حرب كأنها قرن من الزمان ،، تتسرح بعد ١٢سنة الا شهر مريض بالضغط وتضخم البطين الايسر LVH ,ولديك ولدين وبنت هي الاصغر بعمر سنتين !! تبدأ بالتفكير بعمل خاص يعوضك اللي راح !!! يدخل الى الكويت ولم جوالاتك مثل ام البزازين بسبب القصف وخوفك على الاطفال ،،، تخلص الحرب الثانية ، وحصار ،، ودهن مصري لو اردني كريز , وصابون اصفر اردني ومصري ميبري وعلى اساس هو فا،، تمن لا بأس به وسكر ممتاز وطحين وباكله وغيرها من الحاجات الضرورية واحسن بالف مرة من بطاقة اليوم ،، ودفتر للامراض المزمنة وتينورمين اردني لو قبرصي نص ردن وادلات مصري ابيلات نص ردن وعاشت الامة العربية براس ولد الخايبة العراقيين !!! وحل الكلمات المتقاطعة والسماع الى لندن وبأنتظار الفرج !!!
وتبقى دايخ وحاير ونق ،، متشوف فلان اموره صارت زينه ونفط مقابل غذاء ، وظهور طبقة جديدة ، ومن ثم احتلال العراق ومجئ احزاب وشخصيات موديل ٢٠٠٣ ومجلس حكم طائفي ، وبداية لغاوي جديدة ونفاق جديد ، وبداية حرب اهلية وهجرة اجبارية خوفا على بنائك الذي بنيته وهو عائلتك ، وغربة عشر سنوات وعودة الى البيت الموحش ،، لا تقدر ان ترى محل وغرف اولادك وبنتك. ، فهم في الغربة ولديهم مشاكلهم وعوائلهم ،، تنغط بدون سبب ، وانت حاير ،،،حاير بزمانك في خريف العمر ،، ثم يسألني اليوم احدهم ،، وين صاير نادي الصيد وچان ازدحام بسبب زكريا ،، گتله ابني ومعه زوجته المبركعة وطفلين هدومهم وسخة والكشنات مسينه وسيارته بستين الف دولار ،، اطلع كبل لتفوت منا وبعدين ارجع للنادي !! گاللي لازم انت متندل مو من المنطقة !!!!!! ورثت جگارة وبقيت انتظر صديق حاير بزمانه مثلي وعنده سيارة ،، حتى اروح اشتري فروت غامز قبغ اسود وياه !!!!!!!!
طولناها عليكم رفاق ورفيقات مع كل المحبة .

الأبراج وتفسير الأحلام

المتواجدون حاليا

295 زائر، ولايوجد أعضاء داخل الموقع