ذكريات أيام الدراسه في سويسرا

د.طلعت الخضيري



ذكريات أيام الدراسه في سويسرا

بجنب بحيره  (ليمان) عشنه
وياما بغاباتها  تمشينه ودرنه
ومابيهه    أبد  أحد   غشنه
ومدحي هاذه  بحقهه  قليل

فد  يوم  سوينه سفره لبرن
عبالك ذكرى صارإلهه قرن
ولذيجي ألأيام كلبنه   حن
جان بيهه كلشي حلو  وجميل

بأوشي ياما ركبنه    بلم
ومن  زارهه أبد   ماندم
ومن ألهوه اللاهف  سلم
هواها  منعش ويشفي العليل

وبسان فرانسوا       ياما    انتظرنه
وجوه   ساعتهه    ساعات    نطرنه
وبالمواعيد   هناك  دوم     ارتبطنه
والمحب       يقبل  ويصير     ذليل

وكهوه   حلوه   أسمهه   سنترال
تلم صاحبات     ألحسن  والدلال
وحده     كمر    والثانيه  هلال
والكلب    ألهم   كلهم      يميل

وبمطعم لانكلتير  ياما أكلنه سمج
مثله  ماكو لا بطويريج ولا بعفج
وبشوفت ألحلوات كلبي   انبلج
والشهيه  تنفتح    واللعاب يسيل
    
واللي تشوفه  دوم    بلوزان
ما تلكيه أبد  لا بمصر أو لبنان
ألإنسان  يحس  بيهه    إنسان
وماداعي تسوي لنفسيته تحليل


وبيهه  فندق   أسمه   بالاس
يلم  ألأكابر  وأعيان  ألناس
ويختلط بيه من البشر أجناس
ووصفي أله يبقه دوم قليل

وعله الساحل  أوتيل ألبوريفاج
أثاثه مذهبه   ومطعمه  بالعاج
والميض بيه يشفه بدون علاج
وهواه نقي ويشفي      ألعليل

كل سنه جنه   نروح  للكونتوار
وبيه   يطول   ألمشي    والمزار
بمعروضاته  الحلوه ننبهرو نحتار
ولذكره     دوم     كلبي   يميل


ذيج     جانت     أيام      ألوناسه
وماهمتنه بيهه  المشاكل والسياسه
وتصرفنه  بيهه  بعقل    وبكياسه
ياريت نسترجع  منهه     ألقليل
كتب في بغداد 2-2-1994
تفسير:
(بحيره أوشي) : بحيره جنيف  تقع على سواحلها لوزان ومونترو
(أوشي)  كورنيش مدينه لوزان على ساحل البحيره
(سان فرانسوا) : ساحه  ،مركز مدينه لوزان ،وبها مواقف لحافلات وكشك وساعه  يتواعد بها ألأحباء للقاء
(طويريج وعفج) :مدن صغيره  في وسط العراق
(فندق بالاس):  فندق راقي في وسط ألمدينه
( فندق بوريفاج) :فندق راقي على ساحل البحيره في أوشي وبه تمت ألمعاهدات ألدوليه أمثال ألدردنيل  والصلح  بين ثوارالجزائروفرنسا
( ألكونتوار) : ألمعرض ألسويسري ألسنوي للصناعات ألسويسريه.

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

788 زائر، ولايوجد أعضاء داخل الموقع