أيها العراقيون.. عندما تنامون .. تغطوا زين!!!!

                                         

                                                     جلال چَرمَگا

سئمنا و بتنا لانتحمل تصريات المسؤلين ابتداء من مولانا أبواسراء ونائبه السيد مطلك ووزرائه واعضاء البرلمان الذين يعتقدون إن العراقيين (نايمين ورجليهم بالشمس) و يصدقون أقوالهم التي كلها بعيدة كل البعد عن ألأفعال..

ومن يتابع أقوالهم وتصريحاتهم البنفسجية والتي تبدأ ب/ سوف وتنتهي بأذن الله يعتقد ان الديرة بخير وربيع دائم والخير واجد والعراقي بطران بن بطران إذا ما أشتكى من حاجة..

                               

ياترى ماذا يريد العراقي والحكومة الموقرة(الله يسعدها) قد عملت المستحيل من أجل راحتهم وتلبية كافة مطلباتهم..
ـ الحصة التموينية خير وبركة..كلها من مناشىء عالمية وتكفي العائلة وأكثر بدلالة ان تجار الشورجة وجميلة وجميع المحافظات أغلقوا محلاتهم.. منهو يشتري مواد غذائية والحكومة أموفرتها برخص التراب؟؟.
ـ المتقاعد يعيش عصر ذهبي رواتبه بالدولار شهر والشهر الأخر بالين الياباني ونهاية السنة بالأسترليني وبأمكانه أن يعيش عيشة عضو البرلمان وزايد!!.
ـ لابطالة ولاهم يحزنون.. الكل تعمل وبواظئف محترمة..بدليل وجود آلآف من البنغلاديشين والباكستانيين يعملون في العاصمة وبقية المحافظات!!.
ـ الأمن وألأمان على 24 حباية واللي يلكفون عنده مصيادة يروح جلده للدباغ.. طبعا ما نقصد السيد على الدباغ المتحدث الرسمي بأسم الحكومة سابقا!!.
ـ القضاء مستقل (أووووي) ولاتدخل من قبل ألأخوة المسؤلين ..أكبر شارب يرجف أمام القضاء.. لعد شعبالكم قابل ألأمريكان غشمة حينما جلبوا الديمقراطية على ظهور الدبابات؟؟.
ـ خدمات أمانة بغداد ( خمس نجوم).. بدليل كل هالأمطار وبعد ساعة ولاقطرة ماي بالشوارع.. يكولك ألأخ (ابو أسراء/ رعاه الله) أمر الوزارات المعنية وخلال شهر واحد شقوا الشوارع ومدوا مجاري.. بس شلون مجاري؟؟.. يگولون تمشي بيها لوريات محملة بالخضراوات الى علاوي السيدية!!.
ـ لامحسوبية ولا منسوبية..المواطن أولا وثانيا وأخيرا.. نعني من حق المواطن أن ينتقد أي واحد بالحكومة والأحزاب الدينية والقومية والقطرية.. حتى لو تنتقد هادي العامري لاتخاف.. لامنظمة بدر ولا أغتيالات ولا مسدسات كاتم صوت.. أخوية هساع غير أمس!!.
ـ الزراعة؟؟.. لايابة لاء بأختصار البارحة أمصدرين كذا الف طن من الشلغم والفجل والشوندر الى أوربا...
ـ جواز السفر تطلع خلال دقائق.. ما أن تشرب أستكان الچاي عند مدير الجنسية والسفر وماتشوف إلا والجواز بجيبك.. لارشوة.. ولا واسطة...
ـ المخبر السري والتهم الجاهزة انتهت.. لاء.. حتى المادة الرابعة أرهاب عفى عليها الزمن وتبدلت الى مادة أخر  مختلفة تماما..
طبعا أثاري كل هالسنوات والناس اللي راحت برجليها كلها كانت خطأ في خطأ.. ماعلينا هسه.. المهم نبدأ من جديد!!..اللي راح راح!.
ـ المدارس والمستشفيات؟؟..لاتسولفها.. نعني بين مدرسة ومدرسة مستشفى.. وبين مستشفى ومستشفى مدرسة.. بأختصار راحت هذنيج الأيام.. والحكومة أموفرة كلشي وكلاشي من الحبوب الى ألأجهزة المتطورة جدااا وكلها أبلاش..
خو الصيدليات والمستشفيات الأهلية والعيادات كلها عزلت!!
أما المدارس.. تعال وشوف الأبنية والصفوف والرحلات وأجهزة الحاسوب والتغذية المدرسية ..ربيع دائم.. الله يخلي الحكومة!!.
ـ المعامل والمصانع شىء غريب.. نعني أصبحنا مانستورد أي شىء.. كلشي منتوج عراقي.. يكولون وفد من اليابان صارلهم أسبوع يريدون يقابلون وزير الصناعة لأبرام عقد لشراء منتوجات وزارته والوزير ماعنده مجال يقابلهم!!.
ـ أما الدينار؟؟..بهاي..بهاي.. أخوية بأختصار جدا..الدينار أربع دولارات وخمسين سنت.. وعندك الحساب!!.
ـ ألاحوال العامة؟؟..مئات ألأمريكان وألأوربيين واكفين بالسرة أمقدمين على لجؤ..واللجان تعمل ليلن!! ونهارن!!!!!! وماتلحگ!!.
 ************
ـ ولك حمدان .. مية مرة گايلك من تنام تغطى زين..!!!شفت شلون گمت تهذري وصرت چنك عضو بالبرلمان لو بالحكومة.. أكذب..أكذب حتى يصدقوك العراقيين..!!!
ولك بابابة العراقي أمفتح باللبن.. هذه أحچيها للبطة!!!

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

830 زائر، ولايوجد أعضاء داخل الموقع