الگاردينيا - مجلة ثقافية عامة - مخابيل بليه حدود !!

مخابيل بليه حدود !!

                                      

                       سيف الدين الألوسي

العراقي قبل  ومن زمان وبعد أختراع السيارة ..كان أول ما ينكد ويتخبل رسمي ويطبگ الفيوز عنده ولاسباب عديدة  أجتماعية ومادية وسياسية...

يلزم بيده صينية مدورة لو سكان قديم ويحول نفسه الى سايق سيارة لازم الستيرن ويگوم يدگ هورن ويبدل كير ويضرب بريكات ويشحط بنعاله ومرات يندعم  ويتفلش ! وبسبب دوسه على الدشداشة !!,, ومرات الاخرين  ممن أبتلوا  بالضيم يتقمصون شخصية شرطي المرور ويوكفون بالشارع متبرعين بتنظيم السير وقسم منهم كانوا يحملون الصافرة ودفتر المخالفات أبو تلاثين ورقة مع بجامة بازة لو دشداشة !..قسم آخر يتحولون الى شعراء وكان لدينا طالب يساري ذكي جدا ومن الاوائل في الكلية طبگ عنده الفيوز في الصف الثالث بسبب أزمة عاطفية قوية وهجران الحب له وتزوجها  من غيره وسفرها.. وقف بنص نادي الطلبة  يناشدهم بالتبرع له لشراء تذكرة طائرة الى لندن كونه مرتبط بعلاقة مع الاميرة آن  وهي حامل من عنده ورح تولد ويريد يشوف أبنه  وكانت حبيبته السابقة لا تعرف بهذه العلاقة كونه دافنها عليها.. فقال له أحد الاصدقاء (( ليش مو عمتك __ الملكة اليزابيث تدزلك تكت )) .. فاجاب أنا ما أحجي وياها هذه الاستعمارية البغيضة عدوة الشعوب!!
بعد حرب أيران والحروب المتتالية أخذ البعض يلبس زيتوني أو عسكري ويعلق أنواط شجاعة مزورة أو سيفون وحسب الاجتهاد ومنهم المرحوم الذي كان يفتر ببغداد ويكنى بعوعو مع الاسف, وقسم آخر يقلدون الرئيس السابق بمشيته على موسيقى حرس الشرف عند أستقباله روؤساء الدول وأحدهم أبن أحد العوائل الكريمة مع الاسف ..ووو,  ومنهم من لبستهم لجنة شرحبيل السيئة الصيت والظالمة وهم يأخذون راتب الرعاية الاجتماعية وأحدهم كان دائما يقول ترس ترس ومقابيل اللجنة وكان موظفا بسيطا في الاسواق المركزية والاخر يتصور نفسه أمينة فاخت ,, ويقول كلها من وره نصير شمه  (( لا أدري كيف البسته شرحبيل وعلى أي قانون ظالم أستندت وما هي النتيجة ؟؟؟ )) !!!ومن ثم أخذ الكثير يتكلم مع نفسه صباحا وقبل أكتشاف الموبايلات وفي فترة الحصار ... كل تلك الامور هي حالات طبيعية لانعكاس الظروف الغير أنسانية على البشر وكلما كان الانسان عاطفيا وحساسا تزداد معاناته من الظروف الصعبة وخصوصا أذا كان لا يؤمن بها .
اليوم أفكر مع نفسي لو أن أهل سويسرة أو النمسا لو الدنمارك لو هولندا صاير أو أي دولة أخرى صاير بيها مثل مصار للعراقيين طيلة خمسة وثلاثون عاما أشجان صار ؟؟؟
جان سويسرة صارت الشركة العامة للسيارات البشرية وكلمن لازم صينيته ويدك هورن ويفتر وقسم فتحوا خط نفرات جنيف - زيوريخ - بازل ...... أما النمسا فكانت قد ملأت بالشرطة المرور الفضائيين  وليهسه بدون أجازات سوق ولديهم عدة أنواع من الارقام تمتد من فيينا الى سالزبورغ وأنسبروغ ... أما الدنمارك وهولندا فخلوها سنطة مديعرفون شيسوون  بسبب الحالة !!... أكتب هنا بألم شديد لما رأيناه سابقا ونراه اليوم وسنراه غدا  وناس أنكس من ناس !! و حتى لحد يلوم العراقيين على ما جرى لمجتمعهم من تفكك وتغرب وفقر وتخلف...  اللي بيهم  من القهر والضيم يكفيهم  ويكفي أولادهم وأحفادهم الى سابع ظهر نازلا !!و لكن هم أحسن البشر بالطيبة ونظافة القلوب . وهسه  اليوم  آني وصيت على صينية باور ستيرن أصلية  وباور بريك !!!!!    

الأبراج وتفسير الأحلام

المتواجدون حاليا

591 زائر، ولايوجد أعضاء داخل الموقع