أبشروا يا العراقيين، لكل واحد قصر وسيارة و زوجة ثانية و ثالثة!!

       

أبشروا يا العراقيين، لكل واحد قصر و سيارة وزوجة ثانية وثالثة!!

       

مرات أگول فعلاً شعبنا مساكين بحيث يصدگون اية اشاعة بالأخص من بعض الأنتهازيين وعلى راسهم (عدد من رجال الدين) اللي اخذوا الدين وسيلة للثراء الفاحش على حساب الغلابة و الله ما مستعدين يفكرون ولو لحظة حتى يشوفون ياترى سماحته گاعد اعوج ويحچي عدل لو گاعد اعوج ويحچي اعوج!!.

قبل احتلال العراق كان اكو هواية ناس يحچون بيناتهم و(بسرية تامة) و يخططون بكيفهم على اللي راح يصير بعد انهاء حكومة صدام حسين و استلام الحكم من قبل ( الثوار! و الوطنيين الأحرار اللي يخافون الله كلش!!!).
رسالة من الصديق العزيز (ابو زهراء) من الجنوب وبيها مادة رائعة و درس چبير للذين يصدگون كل اشاعة ودعاية والنتيجة مجرد ضحك على الذقون!.
خلونا أنخش بالموضوع:

نقاش بين عراقيين ثنين قبل الأحتلال:

-الاول ... اگلك تدري لو يطيح صدام شنو عدنا كفاءات بالخارج؟!
-الثاني ... لا بشرفك ! تعرف واحد بيهم ؟
-الاول .. واحد شنو ! اگله بالألاف اكو واحد عالم ذرة اسمه الشهرستاني هذا اذا لزم النفط والصناعة والكهرباء يسوي العراق جنة ويگلك الشوارع تضوي حتى ما تعرف انت بالنهار لو بالليل!!.
- خو اكو واحد اسمه الجعفري فيلسوف بالسياسة الخارجية ويتكلم اربعطعش لغة بلبل و والله هذولة يسون العراق أغنى من اليابان ..
- عااااا لابشرفك !!!
- اي وحگ السيد
- ولك يا سيد!!!
- ها شبيك السيد الريس انت وين راح بالك؟؟ .
- اي كمل وبعد اكو غيرهم ؟
- اي يمعود اكو حزب الدعوة كلهم علماء مثل حسن السنيد و عباس البياتي وواحد نسيت اسمه دايما يگلوله مختار عصره من العلم اللي دارسه وكثير من ربعهم !!
- واكو علمانيين مثل واحد اسمه الدكتور اياد علاوي هذا واحد من ربع صديم ضاربة بفاس على راسه ،،، هذا لو يلزم الطب نصير احنا نعالج العالم والمرضى كلها تجيلنه ..
- ؟؟؟ اووووف يمتة يطيح صديم؟؟ .
- غريبة يا أخوي ، صدام هذول كلهم طاردهم وحارمنة منهم؟! ولك ليش هيچي حظنا أگشر؟؟.

- چا نسيت اگلك اكو واحد مختص بالامن القومي اسمه موفق الربيعي هذا راح يسوي العراق مثل جنيف . يصير النوم رغد .
- هاااا وبعد عدنا السادة يمعود بيت الحكيم وبيت الصدر هذول بعد من اسمهم لو يحكمونة يصير العراق قسطاً وعدلاً بعد ما امتلأت ظلما وجورا..
اكو واحد خير كلش و يخاف الله لابس اربع محابس والسبحة ما تفارگ ايده و ابد مايبوگ اطلاقاً اسمه عبدالفلاح السوداني ، هذا اذا لزم وزارة التجارة راح يسوي الحصة التموينية خمسة و خمسين مادة!! گول شني ضمن القائمة؟؟ ، طبعاً عدى الأساسيات تمن البسمتي وطحين صفر و دهن حر و نباتي و زبد وزيوت ومعجون الطماطة و الشكر والچاي السيلاني والشعرية و العدس والباگلة والحمص وحفاظات الجهال و قواطي المربى والدبس و العسل.
- شنهي بروح أبوك؟؟.
تهاي ..تهاي.. نساتل من سويسرا واجبان من هولندا ودنمارك ، سباكيتي من ايطاليا و صمون فرنسي و قواطي الچكليت علامة ماكنتوش و مواسة جوليت مالة الحلاقة من المانيا و صوابين من السويد و معاجين اسنان وصبغ اظافر و صبغ شعر من لندن و ويسكي سبيشل من اسكتلندا وبيرة مجرشة من النمسا .. و حبوب (مقوية للجنس!) و كافيار من روسيا!!.
يگلك ابغداد بعد ماكو تكسيات وباصات النفرات كودن كل مواطن اله سيارة من اليابان (والبنزين ابلاش) و انفاق جوة الگاع للمترو وقطارات امعلگة بين كل المناطق وابشرك هذه المواصلات هم كلها أبلاش!!.
زين اذا كل مواطن عنده سيارة عليش انفاق مترو وقطارات!!؟
خوش سوعال ، يجوز واحد يريد يريح سيارته و يتجول،ليش لاء اذا كلها ابلاش!! شنهي المانع؟؟.لو ملايين السياح من يجونه بيش يتنقلون؟؟
وازيدك علم راح تكون مساوات (يعني الوظائف مو بس للزم) وكل واحد صاحب خبرة ومن غير شهادات دراسية يگدر يشترك بالحكم..مثلا:
تعرف بدرية أم اللبن و عمشة أم الگيمر و فليحة أم الخضرة؟؟.
شلون ما أعرفهن؟؟
لاتستغرب اذا شغلوهن مستشارات بدرجة وزير بوزارات الصناعة والتخطيط!!؟ ...لو برلمانيات لو دبلوماسيات بالخارجية بدرجة وزير مفوض !!.
دخيلك ، هيوااااش وهذني شيعرفن غير يفرشن بضاعتهن بسوگ العورة بمدينة صدام!؟؟.
ولك لاتصير غبي هن الأصل ، هذني عدهن خبرة بمجال اعمالهن ويعرفن دبلوماسية الأقناع و التكلم وجلب الأستثمارات من الخارج و تطوير القطاع الزراعي و الصناعي و الدبلوماسي!!.
أما الشباب اللي مامتزوجين الحكومة تزوجه من وحدة لو اكثر وكل المصاريف تتحملها الحكومة الوطنية من ذهب و زواگة واثات وسيارة ومفتاح بيت و بطاقة سفر لقضاء شهر العسل و كلها ابلاااااش!!.

أما الرواتب كل خمصطش يوم وراتب ، نعني مو مثل هسة كل ثلاثين يوم ، بالشهر راتبين ويجوز أزيد!! ،أخوية ناس تخاف الله و مصلحة الشعب گبل كلشي!!..
شأعدلك يا خوية.. ربيع دايم !!.
أما اذا لزم جبر باقر الزبيدي اللي حاليا يبيع جناسي مزورة بالشام وزارة الداخلية يگلك حتى دكاكين الصاغة يعوفون محلاتهم مفتوحة ويروحون لأهلهم ، منهو يتجسر ويبوگلة حلقة لو محبس غير يعلگة اباب ذاك المحل؟؟. وحتى المسلسلات التلفزيونية هم راح تنتعش كودن هو ممثل كوميدي وتراجيدي وصديق الممثل جاكي شان و شامي كابور!!.
خو اذا اذا صار وزير اسكان؟؟؟ لاء صدگني كل مواطن عراقي راح يملك بيت بحديقة وگراج للسيارة وبذاك الوكت منهو يسكن شقق لو بيوت صغار؟؟..لاء عمي لاء كلها فلل و قصور!!.
أما الحاج هادي العامري اذا صار وزير النقل راح يفتح بكل مدينة مطار وكل الرحلات ابلاش ، نعني تركب من بغداد وتروح بالطيارة الى المحمودية وبعگوبة وسوك الشيوخ ابلاش!!.
أما اكو سيد اسمه بهاء الأعرجي هذا حالياً يبيع جواريب رجالية بلندن ، هذا يگلك خبير يصلح يكون بأي موقع حكومي نعني مثل (ست البيت) يگضي كل الشغلات و يتبرع بنص راتبه للفقراء والمحاجين!!.
ليش بذاك الوكت وين اكو فقراء ومحتاجين؟؟.
نعني قصدي اذا اكو واذا ماكو (انا متأكد ماكو) يتبرعها للحسينيات لو يشتري بيهن تمن و لحم وزردة ليوم العاشوراء، لعد شلون عمي هذولة شبعانين ويخافون الله قابل مثل الجماعة؟؟. !!.
أما الشيخ جلال الدين الصغير اذا استلم وزارة الأوقاف!! لاء راح يخلي العراقيين كلهم حجاج و كل المصاريف ابلاش و الرجل خير و لا تتصور يمد ايده للحرام.. اعوذ بالله هذا الصغير والحرام؟؟؟.
- زين وكردستان شلون ؟
- لا اذا طاح صدام نطب ونطلع عادي لان هسة مشكلتهم بس مع صدام ..
- يمعود خاف يطيح وتطلع كلها كلاوات؟؟
- خاب گوووم ولك اذا على اهل الدين هذول يدورون الاخرة ويخافون الله وما يتعدون على أحد ومايبوگون ابد ابد .. لاتخاف.... واذا على اللي بالخارج فهذول شايفين وعايفين وشبعانين وراح يوكل ما الشهد،،،
.....
بعد ١٧ سنه تلاگو الشباب وبدون كلام .. واحد تفل بوجه الثاني!!!.
يا فرحة اللي ماتمت.. ورح يا معلم ، شگد حلو من نگعد أعوج ونحچي عدل!!.
الى اللقاء بسالفة أخرى.. اودعناكم عيوني.
رئيس التحرير

        

   

إذاعة وتلفزيون‏



الطرب الأصيل

الأبراج وتفسير الأحلام

المتواجدون حاليا

576 زائر، ولايوجد أعضاء داخل الموقع