أسمعوا زين .. ثبت حسنة ملص أشرف منهم!!!

   

أسمعوا زين .. ثبت حسنة ملص أشرف منهم!!!

نادرا ما نسمع دولة أو مجتمع ما بيها فساد وسرقة ولكن الشغلة نسبية ، نعني أكو دول أتصير بيها هالحلات ولكن بنسب قليلة بحيت ماتذكر.

أكو دول شوية أكثر ونسبة الحرامية معروفة ببعض الوزارات والدوائر الخدمية مثل المالية البلدية والأسكان والزراعة والتجارة ..
وأكو دول مثل العراق والصومال و دول عربية اخرى تعبانة ..لاء الفساد والسرقة للظالين وأكثر بهواية!!.
حتى للحرامية والحنقبازية اكو عندهم ضمير و اكو شغلات مايتقربون منها اطلاقا مثل الأمور اللي تتعلق بالدين وأموال اليتامى والفقراء والشهداء و المعوقين وقوت الشعب.
نعم هذه خطوط حمراء للحرامية اللي عندهم ضمائر واكو مخافة الباري عزوجل بقلوبهم.
احنا ماعلينا بغيرنا ، نحچي على بلدنا المنكوب والمحتل من أكثر من جهة سواء من الشيطان الأكبر أو ايران أو اهل العمايم اللي اجوي على الدبابات الأمريكية وشمروا عمايمهم بعيد وصاروا أفندية وگاموا يسبون وينعلون الشيطان الأكبر كودا واحدهم للسه ما صار ملياردير! ، لاء وحق العباس بعدهم بطرگ كم مليون وكلها ما تتعدى المية مليون و كم عقار بطهران وبيروت ولندن وكندا!!
الأخ نسى اوتناسى بالأمس كانت حسرة عليه سعر لفة شاورما لو كباب و بطل كوكا أو بيبسي كولا.. سبحان المغير الأحوال!!.
أكو قصة حقيقية تتعلق بأمانة أكبر قوادة بزمنها ( حسنة ملص) صاحبة ملهى بالموصل.
السيدة المحترمة حسنة ملص كانت زنگينة من ورا شغلتها بالدعارة وادارة الملهى وعلاقاتها الخاصة بالناس المتمكنين واللي يدورون شغلات ماتنحچي!!..
لذلك من الضروري أن تحط فلوسها بالبنك ، وفي وكتها ماكو غير بنك الرافدين فرع لواء الموصل.
كان الموظف المسؤل عن الأيداع أو السحب أسمه (اياد قاسم الحسيني) وكان معروف بنزاهته وحرصه والأهم دقته في العمل كمحاسب أو مصرفي ويحترمه عامة الناس .
فد يوم من الأيام راجعوا الحسابات اليومية واذا بكارثة ، هناك ٣٠٠ دينار ( دينار ينطح دينار) نقص!!.
طبعا كانت هذنيچ الأيام وكت الخير والبركة هذا المبلغ بكل المقاييس مبلغ ضخم!!.
اتصلوا بكل العملاء اللي يتعاملون مع المصرف واللي تعاملوا هذاك اليوم من تجار وكبار الموظفين وشيوخ العشاير ولكن دون جدوى ماكو نتيجة فص ملح وذاب!!.
بعد ما أيسوا قرر الموظفين بهذيچ الشعبة أو القسم وبعد أن وافق المدير أن يرجعون المبلغ الى المصرف ، كل شهر مبلغ ( يجمعوها بيناتهم ) وتنسد القضية وحرصوا أن تكون الشغلة بيناتهم فقط لكون هذه تعتبر مسألة خيانة أمانة بدائرة بوزن مصرف الرافدين ، نعني هالمبغ الضخم وين صار وشراح أدگول الناس؟؟؟ هذه تأثر على سمعة البنك لا والله حتى الحكومة!!.
في اليوم التالي واذا بأبن ( حسنة ملص) يدخل عليهم ويگول:
- أمي تسلم عليكم وأدگول البارحة سحبت مبلغ وتبين بأن هناك زيادة بمبلغ ٣٠٠ دينار!!.
كلهم فرحوا وشكروا ابن السيدة المحترمة ولكن الأبن گال:
- امي ادگول خلي يحسبون المبلغ زين گدامي ويتأكدوا من الرقم وبعدها أروح.
حسبوا المبلغ كان تمام التمام من غير نقص ولا دينار!.
طبعا قدموا شكرهم لهذه المواطنة الأمينة والحريصة على اموال الدولة والشعب والله يكثر من أمثالها !!( طبعا بالأمانة والأخلاص مو بغير شىء) لاتروحوا بعيد رجاء!!.
احلفكم بالله:
لو واحد من الأخوة النشامى اللي دخلوا العراق مع أول دبابة أمريكية وحصل وياه هالقصة تتوقعون يرجع المبلغ؟؟؟؟.
بالتأكيد لاء كودن جوع عتيگ ومايشبعهم إلا التراب ، وإلا شايفين فساد حتى بدوائر الأوقاف اللي تتعلق بالدين؟؟.
لو معقولة يسرقون الملايين من اللي مخصصة للفقراء و المعوقين والشهداء؟؟.
لو يسرقون الملايين على حساب مشاريع وهمية وحتى لو نفذوها ورا كم شهر تطلع الخيسة ،اذا جسر يوگع و ينهار ويسبب كارثة واذا شارع راح ينتهي وترجع الحفر ولا كأنما شىء صار ومن غير حساب أو كتاب!!.
الطمة الكبرى واحدهم بدلة اوربية من غير رباط ( كودن الرباط حرام في حرام في حرام حسب فتوى الخميني) ولحية خفيفة وكم محبس و سبحة مية وواحد وكم سيارة دفع رباعي وسطعش من افراد الحماية بيناتهم ضباط و ضباط صف ، ويگعد ويگوم:
- بسم الله ، استغفر الله ، ان شاء الله..
ولكم عليمن يا حرامية وحق الحق حسنة ملص أشرف منكم بألف مرة وتروحولها فدوة !؟..
نعني حسنة ملص موخوش و تدخل الجهنم وانتم خوش اوادم وابواب الجنة مفتوحة لشكولاتكم الزفرة؟!!.
لاء خالي لاء هذه ماينلبس عليه عگال مطلقاااااً!!.
في أمان الله عيوني أنتم ، والى سالفة جديدة..
أخوكم
رئيس التحرير

          

  

إذاعة وتلفزيون‏



الأبراج وتفسير الأحلام

المتواجدون حاليا

572 زائر، ولايوجد أعضاء داخل الموقع