الگاردينيا - مجلة ثقافية عامة - كتلوا ربعه وهو يتحزم!!!

كتلوا ربعه وهو يتحزم!!!

           

          

حول دخول كتيبة عسكرية تركية أراضينا بمختلف انواع الأسلحة من دبابات و مدرعات ومدافع وتعسكرها في احد المعسكرات قرب الموصل واحتجاج الأخوة النشامة في الرئاسات الثلاثة وكأنما شىء غريب:
- شلون يندسون بأراضينا الطاهرة من غير موافقة..؟؟
- لازم نرسل طائراتنا ونقصفهم ونقضي عليهم..
- لاء.. يابة لاء..راح أندزلهم قوات الحشد الشعبي و ننهيهم وأنلقن هؤلاء القارداش درسا بليغا حتى يصيرون عبرة لبقية الدول!!، كل الصوچ والتقصير من وزير الدفاع وهيئة الأركان لكون شافوا الأخوة القارادشية في المعسكر و ما أتخذوا رد سريع و حاسم كان يگدر يخلي طشارهم ماله والي!!!

بالعظيم مسخرة.. لابل مسخرة خمس نجوم وفضيحة الفضايح..
أخوان شنهو نايمين نومة أصحاب الكهف..؟؟..شبيكم ؟؟وين أنتوا بس ملتهين باللغف والشفط و اللفط والتناحر عالمناصب والبوگ؟.
ولكم يا أراضى؟؟ يا سماء؟؟ يا بحر؟؟ يا هواء؟؟
كفيلكم أبو خيمة الزرگة حتى جيش جزيرة الواق واق متواجدين على أراضينا خو الجواسيس لاتسولفوها.. حتى الصين الشعبية و تايوان متواجدين و يشتغلون على أقل من مهلهم!!.
يگولك هذولة الرفاق واحدهم كارثة لابسين ساعات عادية بس بالحقيقة كلها اجهزة فول اوتوماتيك بس يدوس دوگمة يتصل رأستا! بالعاصمة بكين و ينطي تقريره اليومي..
آخ لو أعرف على شنو يتجسسون؟؟ معقولة ينقلون أخبار الحزب الشيوعي العراقي و نشاطات أعضاء الحزب بالبرلمان والحكومة؟؟
حسب علمي الرفاق الحمر بالعراق هابياض..لابرلمان ولا حكومة!!
نرجع لأستنكار الحكومة على تواجد الأخوة القارداش على أراضي العراق.. هذه ذكرتني بسالفة قديمة:
أيام زمان رجال و زوجته رايحين من قرية الى قرية اخرى.. وهذاك الوكت لاسيارات ولا وسائل اخرى غير المشي وأستعمال الحيوانات بالتنقل..
المهم الرجال أمفتل شواربه وخنجره بحزامه ومرته اللي كانت كلش حلوة متقوية بأبو شوارب وخنجره تمشي ورا!!
هناك فجأة شافوا عدد من قطاع الطرق .. وصلوا يمهم اخذوا المرة على صفحة و رسموا دائرة حول الأخ ابو الخنجر وشواربه يوگف عليه الصگر و گالولة:
شوف زين و فتح عينيك ، أنت.. تبقى داخل الدائرة بس تطلع من الدائرة تنكتل.. ومالك شغلة بزوجتك.. أسمع كلامنا ورا شوية انسلمك مرتك و الله وياكم!!.
المهم الأخ أبو الخنجر ظل واگف بمكانه ولاحركة وديشوف وضع زوجته المسكينة ويه هالوحوش..!!
بعد ساعة گالولة.. عافية شاطر سمعت نصيحتنا و ماتحركت.. هاك زوجتك روحوا الله وياكم..
مشوا بطريقهم ، المرة ظلت مفزوعة ياترى هالرجال هالطول وهالعرض وهو خنجرة ليش ما تحرك ، خوشاف كلشي بعيونه  وسألته:
ياراجال وينك أشو ماتحركت ظليت مثل الصنم بمكانك شنو هالگد جبان واني ما أعرف..؟
رد عليها و هو يفتل بشواربة وية ضحكة وگال:
وداعتج نعلت والديهم..!!!
گالتلة: شلون يا مصخم شسويت؟؟ شلون؟؟
گال : هم مو خلوني داخل الدائرة؟؟
گالت: اي أعرف..بس شسويت؟؟
گال:وعيونج طيلة هذيج الفترة وانتي وياهم اني چنت خال رجلي خارج الدائرة وما خفت من تهديداتهم!!.
باوعته بعين احتقار وگالت:
والنعم منك يابن العم .. صدگ لو گالوا: كتلوا ربعه و هسة بدأ يتحزم!!
مربط الفرس:
الحكومة العراقية الرشيدة بعد تواجد عساكر الدنيا من أمريكا وايران وحزب الله و الحوثيين والغرب هسة شعرت بأن أراضي العراق مقدسة ولايمكن السكوت على هذولة القارداشية..
واحدهم أمخلي رجلة خارج الدائرة من غير أي خوف من جيوش العالم ...
واللي يقهرك واللي يضحكك في نفس الوقت تبين ان هؤلاء القارداشية متواجدين هناك منذ سنتين والحكومة الأتحادية نايمة ورجليها بالشمس!!
من موت الكرفكم صطعش الف مرة.. چمالة شايلين خناجر وواحدهم شواربه يوگف عليه الصگر وأكثر من محبس فضة بأصابعهم و وراهم فوج حماية ودرزن سيارات دفع رباعي ..و يخربون عالتصريحات گدام الأعلاميين عبالهم مانعرفهم ..والله هذاك الرجال اللي چان وية زوجته أشجع منكم بألف مرة..

أودعناكم أغاتي ....

رئيس التحرير

    

إذاعة وتلفزيون‏



الأبراج وتفسير الأحلام

المتواجدون حاليا

495 زائر، ولايوجد أعضاء داخل الموقع