كتلو عمر كتلوعلي


ميسون نعيم الرومي

كتلو عمر كتلوعلي

*كتلو عمر كتلوعلي – ولد الفقير المبتلي
علّاوي ، حسن .. حمودي ، جاسم وحسين
صار العدد بالخمسين - لسماء تالي اوتجي
شعب العراق المنسبي
كتلو عمر كتلوعلي
***
حسره اوألم ضيم اوقهر – جوع او مرض ماينحچي
يعراق قصـَّـه قصتك – يحكمنه ساقط وي غبي
تفجير..ذبح او خطف – لجل الفرس بامر الولي
باگو وطنه يا (علي)
كتلو عمر كتلوعلي
***
عقدين مرّت يازمن – والجاره تلعب شوملي
نـِخـْلـَوْ الثروه والنفط – مشروع صرنه أجنبي
ماضل زرع لا ضل ضرع – لا عـِلـِم ضل لا رُقي
هذا الفقير المبتلي
كتلو عمر كتلوعلي
***
الشعب اخوه يا وطن – مايرضه حكم الطائفي
اشبعنه لـِجان اوقشمره – لو تستقيل اوتستحي !
إعلام اوصور وي هوبزه – اخجل اشويه وانزوي
احسابك قريب اويجي
كتلو عمر كتلوعلي
***
ليوين تحمل..ما تـِـمـِـل؟ - ذلـَّه اومهانه مرتضي
كتلوْ اولادك يا شعب – ليوين ساكت منحني ؟
امن اجل الكراسي ننطحن – مسحوگ دومك بالرحي
ليون تبقه منسبي
عريس گالوْ علي
كتلو عمر كتلوعلي
***
صار اللحم بالأرصفه – دم الجره يچوي چوي
لحم انعجن ويه الهـِـدِم – بالات ، (ترمس) منچفي
رجلين ادين امطشره – لعيون .. ربهه اوتشتكي
المن نروح اونشتكي؟
كتلو عمر كتلوعلي
***
ترمسك بيدك ينتظر – چايك امهيل يشتكي
صار الظلام اومـَـرْجعت ! - أمك تتاني يا صِبي
-(علاوي) ما رد يا وطن – الله واكبر يا وطن
هذا الفقير المنسبي
كتلو عمر كتلوعلي
--------------------------
*كتلو عمر كتلوعلي:- الأخوه (عمر وعلي) ضحايا
التفجيرالمزدوج الاجرامي اللعين
الذي استهدف سوقًا شعبيًا في منطقة “ساحة الطيران”، وسط “بغداد”،
التي غالبًا ما تعج بالمارة وذلك يوم الخميس المصادف 21/1/2021
------------------------
24/كانون الثاني/2021
ســـتوكهولم

 

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

645 زائر، ولايوجد أعضاء داخل الموقع