من سوالف الكلية !! بالسبعينيات !!! الى زمن الكورونا !

                                            

                        سيف الدين الألوسي

من سوالف الكلية !! بالسبعينيات !!! الى زمن الكورونا !

في السبعينيات وخصوصا في منتصفها كانت الامور روعة ،،، والناس عايشة ، ماكو لا طائفيات ولا انت من اي عمام ولا تيفو !!!

الجميع اصدقاء واخوة وملتهين بالحياة الجميلة في بغداد والعراق ،، شغل ،، حياة رخيصة ،، سفر داخلي وخارجي،، حفلات ،، سينمات ، مطاعم ،، زواغير ،، بارات ، نوادي ، كليات وجامعات من افضل جامعات الشرق الاوسط والعرب واسيا بكل شئ ،، اساتذة ومناهج وتفوق علمي ينضرب به المثل ،،، وقبلة للطلاب العرب والاجانب للدراسة فيها ،،
في دورتنا بالكلية كنا مجموعة اصدقاء منذ زمان ،، التمينا بنفس الصف بالكلية ،،
قررنا انا واصدقائي اخوتي ، نادر جورج نصرت والمرحوم الشهيد وديع علي المثنو والمرحوم رياض شاكر الامامي وموفق زكو ورياض الحريري ووميض قنبر وامين خاكي وجواد الكليدار واياد طارق حمدي وخالد الحديثي ووهاب الراوي وسرمد المختار والعديد من دورتنا وانضم الينا بعض الاصدقاء من الادارة والاقتصاد ومنهم الاخوة عصام عبد المجيد و علاء الصايغ والمرحوم طلال الزبيدي وديسم الدليمي ووو العديد الاخرين ،،، اتفقنا جميعا على التكلم باللهجة المصلاوية او المسيحية في بغداد ،، نجي الصبح ،، نشوف الغبع قاعدين !! اشونكم !!!
يجاوبون ، مليحين !! مرة خالد الحديثي گال ملاح ،، كناله لا فلفل احسن !!!
المهم ،، كله ،، ولك مفجوع ،، غماد بغاسك ،،، غماد ببيتكم ،، وفشار بالمصلاوي والمسيحي ،، وبقينه سنة تقريبا على هل الرنه !!!
فد يوم فد بنية بصفنا گالتلي ،، سيفي ممكن سؤال ؟؟؟
اي تفضللي اشتريدين تسألين !! قولي كن لتستحين !!!
گالت ،، اشو انت الوسي والالوسية مو مصالوة ،، ولا مسيحيين ،، عجب هيجي تحچي !!! ؟؟؟ تراهنت ويه وحدة انت مسلم ومن بغداد ،، وهي تگللي لا يابه مصلاوي ومسيحي !!! واذا الوسي ،، اصلا شكله مال مصالوه ومسيحيين !!!!!!
جاوبتها ،، وكن شنو الفغق !!! ما كلنا عغاقيين !!! اش رح تفغق !!!
گالتلي تمام ،، بس انتم هذا الگروب رح تخبلون الكل ،، ساعة تحچون مصلاوي وساعة تذبون علچ بالگاع وتتراهنون على اول وحدة تدوس عليه ،، وتحچون مثل الريسزجية !!!! نيالكم لا هم ولا غم !!!!
صدك چنه لا هم ولا غم ،، بس سطرونا بعين ومن تخرجنا ولليوم صار اثنين واربعين سنة ،،، مندلينه دربنا وصار طشارنه ماله والي ومنهم من استشهد او تأسر وانفقد ،ومن ودعنا، ومنا من تهجول، بالقارات،، وكذلك اليوم نحن في زمن الكورونا ومن ينتظر يومه !
نرجع للزميلة التي حرگتنه كوننا بلية هم وغم ، خطية هي بدون قصد نطقت بذلك !!! هسه خطية تلفانه ومتهجولة بأميركا وحايرة بزمانها ،، حرگت روحها همين !!!
ما كن لو باقية ساكتي مو كن احسن الكي والنا !!!
ما كن انفجع الكل والكل نزل غماد على غاسهم !!!!
الرحمة لمن رحل وطول العمر للباقين وكل البشر .

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

948 زائر، ولايوجد أعضاء داخل الموقع