ثلوج في بغداد !!! بمناسبة نزول الثلج قبل ثلاثة اشهر !! فانتازيا بغدادية !!!!!!!

                                               

                           سيف الدين الألوسي

   

ثلوج في بغداد !! بمناسبة نزول الثلج قبل ثلاثة اشهر! فانتازيا بغدادية !!

گعدت اليوم الساعة السادسة والنصف صباحا على صوت غريب بحديقة البيت ،، فتحت الشباج ،، فاذا بدب قطبي ابيض مربرب ديتريك گيمر ودبس تحت الثلج ،، التفت علي وقال ،، عمي عندك فد صمونة حارة ؟!!!

رجعت انطيته صمونه ،، وهو يقول ،، شلون گيمر ناهي عدكم ببغداد ،، ذبحني الزبد الجايف مال كيبك بكندا ، واللحم اليابس مال الاسكيمو !!!! بلد هيجي حلو ، ليش ميصير بمستوى احسن الدول ،، والله رح اتخبل !! صدگ قهر !!!
ده اباوع بالشارع شفت غزالتين للرنة ،، رحت ركض چبت شبچه مال سمچ وچان اشمرها عليها ،، لان سلاح ما عندي بالبيت بطرگ سچاچين المطبخ !!! صدتها بالشبچة !!! وحدة گالت عمو تقبلها ،، احنه صارلنه ٢٢ ساعة طايرين من نيوفوندلاند بكندا ، وجايين شهر العسل لبغداد وانت تصيدنه !!!! استحيت من نفسي وگلتلهم تفضلوا لعد ،، خوش دبس وگيمر وكاهي ، تعالوا تريگوا ،، والله مچذبوا خبر وجوي وبعد ان اعتذرت منهم وشلت الشبچة !! وگاموا يصورون البيت واخذوا صورة تذكارية ويه گلبي المخلص سيزر همين !! ، لانه مشايفين بيت طابوگ ،، وشربوا چاي ،، وگالولي عمو خابرنه تكسي عرف يسويلنه فد فره بالمتنبي وسوگ هرج ،،، نريد نشتري زوالي همين من المستنصر گبل منسافر ،، خابرتلهم التكسي وودعتهم وانطيتهم هدية تذكارية وباكيت سومر ازرگ ونص عصرية للذكرى ايضا !!!
هذا الوكت كله والدب يمكن اكل عشر كيلوات گيمر وجليكان دبس وخمسين گرصه وصمونه !!! وترمسين چاي احمد !!!!
وراها اندگ الجرس واذا الزبال لابس هدوم سانتاكلوز ،، وچان يگللي عمو عدكم زبل !!! گتله فد دقيقة !!! وطلعتله برميل الزبل ، واذا شاد ستة بطاريق بسيارة الزبل ،، گتله بابا خطية ، هدها ،، هايه متنأكل !!! والله طلع خوش ادمي وهدهم ،، وجوي طلبوا لجوء حيواني يمي بالبيت ، لحين تسفيرهم باقرب وقت للقطب !!!!
وهمين وره شوية اندگ الجرص ،، واذا اربعة نسوان ورجال من الاسكيمو ووياهم عربانة دتجرها عشر چلاب واگفين ديگدون بالباب ،، !!! گلتلهم هايه خمسة الاف دينار روحوا اشترولكم خمس لفات فلافل من راس الشارع ،، صاروا ممنونين بس مفتهمت شحچوا !!!
رجعت گابلت التلفزيون ،، ولعبت نفسي من اخبار السياسة وگلبته على ناشيونال جيوغرافيك لگيت الدب ديسويللي باي باي وهو ديصعد بالطيارة مغادرا !!!!
والله ليچذبني !!
شلون ويه غيرة الحواوين !!! تعال ابتلي ويه حواوين المنطقة الاصليين وعتبهم !!! عقل يوك !!!

صار تلاث تيام سيزر الكلب المدلل گالب خلقته ويايه ،، اشبيك قيصر ، ميجاوب ،، احد غاثك ،، ميحچي ،،، البارحة المغرب ،، اجاني بهل البرد وبسكوت شاورني مو گدام العالم ،، گاللي باچر ملتمين شكو حواوين بالمحلة يردون يقابلوك !!! وبجرأة غير متعودها من سيزر !!! ساعة بيش ،، گال ،، بين الخمسة والستة المغرب !! منو انطاهم موعد بهل الوگت ،، جاوب بكل صلافة اني ،، بلگي عندي شغل ، غير تسألني ،،
عمو اعرف انت گاعد ،، تگعد من النوم ساعة اربعة ونص وتشرب فنجان گهوة وجگارة ،، وتگعد تقره وتسمع اخبار !!! ومن عندك طلعة اني اول واحد اعرف ،، لأن تزين لحيتك وتخلي ريحة اشتمها من بعيد !!!
گتله ميخالف خللي يجون !!!
اليوم نمت اقل من ساعة الظهر وتحضرت من وگت لمقابلة الحواوين بالمنطقة ولاعرف المشكلة شنو !!!
ساعة خمسة بالضبط دخل سيزر ووراه وفد الحواوين ، وهم الهر اباقة حفيد طروب ومسميه على اسم جده ،، والبومة الايجة فتوح ، والبلبل كوكي ، والحاج ابو بريص ،، والغراب تشارلس ،، والعگرگه أغراء واخيرا الحية النائمة سهاد !!
تفضلوا شكو ، خير ،،، وسيزر لازم النوت بوك والقلم ديسجل ويكتب الملاحظات !!
جاء الهر اباقة وقال ،، ستلخص لك عميدة حواوين المنطقة شكوانا وشكوى كل الاحياء الحية بالمحلة !!! گلتلها تفضلي ست فتوح !!
گالت فتوح ،، اليوم اني گعدت من النوم من غبشة علمود هذا اللقاء ،، وكذلك الحية سهاد والعگرگة اغراء والمگرود حجي ابو بريص فزوا من سباتهم الشتوي وتحملوا عذاب الگعده لاجل هذا اللقاء !!!
خير ان شالله ،، شكو احچي !!!
گالت ، انت متخاف من الله ،، قبل ثلاثة ايام الكل تفاجئت بالثلج والبرد وممشترين لا نفط ولا ماخذين اكل وچماله كهرباء ماكو ،، ردنه نموت كلنه ،، حتى سيزر المدلل صارت بطنه اسهال من البرد وگام يذب من راسه ،، معرفت تسأل علينه ، وچماله جوي حيوانات ثلجية وقطبية ويه العاصفة ،، حرت شسويتلهم ،، هذا الدب الابيض وفوك مفززنه وخلانه كلتنه نبول جوانه ونبوك هوه ،، ترحب بيه وتزقه دبس وگيمر وصمون وخبز حار ،،،، والزوج العرسان عزلان الرنه تنطيهم كاهي وگيمر وتخابرلهم تكسي على حسابك ،، والبطاريق دخلتهم جوه للبيت على التدفئة وانطيتهم چاي وكليچة ،، وحتى مگادي الاسكيمو ناوشتهم فلوس الريوك !!!! وچماله همه غربة وما الهم ارتباط بهذه الارض ،، وچماله حاجزلهم على الفيرست كلاس للرجعة بالطيارة !!
فوگ ك ،، چيلت ماش !!!!
اني چنت دا ارجف من البرد ، اخابرك اريد ربع كونياك ،، متشيل التلفون ،، ادزلك مسجات ماكو !! ،،
خطية هذا اباقة الحفيد حفيد حبك طروب،، وهسه بريعان شبابه وديريد يتزوج بشباط ،، رب العباد جاب البرد والثلج وهذا الدب ، وخله البزازين الشابات تنهزم وچماله هو من شاف الدب ،، فز وصار عنده عطل نفسي للزواج ،، انطيته حباية سيالس ام العشرين وماكو فايدة ،،
الغراب تشارلس مديسمع من النشلة والتهاب الجيوب !!!
كوكي حسه طبگ ،،على الاقل انطي مي لبلبلي دافي !!! ودهن زيت !!
حجي ابو بريص صعد عنده الضغط والسكر صار ٤٠٠ من الفزه والبرد !!!
العگرگه اغراء كطعتها العادة من الفزة وبعد متبيض وهي في اوج عنفوانها وشبابها !!!
الحية الحالمة النائمة سهاد ،، من شافت الدب بالحديقة ،،صارت هيستيريا وگامت تعض بالطابوك مال الاسس وتكسرت سنونها !!!
ظالم متخاف من الله !! سويلنه چارة !!
وطول الوكت سيزر يسجل !!
رجعت اني ،، وگلتلهم يابه حقكم ،، وصلت شكاويكم ،، ورح اشكل لجان مختصة لمعالجة معاناتكم !!!
نطنطت فتوح وگالت بحس ناصي ،، موت يا زمال الى ان ييجيك الربيع !!
وابو حس المطبك كوكي گال من ط نوفي الديانة!!
صار عصبي سيزر وگاللهم ،، اللي يلغي زايد بعد ،، أحرگ امه وابوه واشك حلگه !!! بلية لغوة زايدة ،،!!!!!!!!!!!!
خلصت المقابلة ،، كلمن يوللي يرجع لمحله !!
شلت لحماية زينة وعظم زند انطيته لسيزر !!!!!! وحبايتين لوموتيل وحباية بلازيل !!
والكل رح يصيرون من القهر مخابيل رسمي او ، عقل يوك ،، وبضمنهم المتكلم !!!!!!!!!!!!!!!!! بهذه الحياة المخربطة وخصوصا بعد ان صار سعر النفط بالناقص اليوم .

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

852 زائر، ولايوجد أعضاء داخل الموقع