التقاعد والترحيل !!! شوية بلا سياسة !!!!!

                                        

                      سيف الدين الألوسي

    

               التقاعد والترحيل !!! شوية بلا سياسة !!!!!

في السبعينيات طلع قانون للمرور ، يأمر بترحيل سيارات الاجرة التي مضى على موديلها ١٥ سنة للمحافظات ،، واتذكر بدأت سيارات الخمسينيات كلها بالترحيل ولغاية موديل ١٩٦٠ وكانت معظمها من نوع شوفرليت ،، ومنعت السيارات الشوفرليت من موديل ١٩٦١ لغاية ١٩٦٤ من دخول شارع الرشيد وتحولت الى شارع غازي ، ومن ١٩٦٥ الى ١٩٧٠ من العمل على المطار !!! طبعا معظم سيارات التكسي المرحلة كانت من نوع شوفرليت امبالا ، حصان الشغل الذي لا يتعب وكذلك ڤولكا موديل ١٩٦٩ المسماة البعيرة ،، ودخلت الڤولكا ١٩٧٤ والكراون ١٩٧٥ الى الخدمة كونها كشخة !!!! بقيت الشوفر ١٩٥٧ تشتغل مثل الساعة على خط بغداد فلوجة وبغداد رمادي وموصل اربيل وكذلك بقيت الشوفرليتات من موديلات الخمسينيات والستينيات تشتغل بالمحافظات الجنوبية والشمالية والرمادي الى نهاية الثمانينات !!! وقبل ان تأخذ القيادة الكراون والڤولكا ثم البرازيلي في الثمانينات والتسعينيات في بغداد !!! وما عدى مدينة موسكوفيج سيتي اي الحلة الفيحاء فبقيت الموسكوفيج متسيدة الى وقت قريب ولا ادري سبب عشق الحلة للموسكوفيج وخصوصا بلون الكاروكي الازرق منها ،(karooki blue ) ,,,
نرجع لسالفتنه ،، وحول ترحيل مواليد ١٩٥٩ فما دون الى المحافظات او التقاعد ،، ولو اني متقاعد من عمري اقل من ٤٠ سنة !!!
هسه رح يزداد النق بالبيوت والرجال المتقاعدين كلمن رح يشتريله زي صيفي عبارة عن تخم لباس ابيض يا ظالمني وفانيلة بيضة علاگه وصوندة مي ، حتى يطلع يمارس هوايته الصيفية برش الشارع والحديقة باللباس والفانيلة صيفا ،،، اما الزي الشتوي فهو بجامة بازة تفضل ان تكون مقلمة وبنتوف لو ترلك وجواريب صوف وروب صوف مربعات او كاريهات ابو الحبل ،، وسدارة ام الفرو مال مصقوف لو عرقچين باكستاني ،،، وحتى يمارس هوايته بلبسها وجلب الصمون الحار والكيمر صباحا والجريدة ليحل كلماتها المتقاطعة ! ، راجلا او بالسيارة ،، والمسواك اللحم والمخضر ظهرا ،، ثم مگابلة الشاشة مساءا ،، والنق براس مرته ،، اشرح تسويلنه عشه ،،، الباميا الظهر كتلتني چانت كلها دهن !!! ،، وين خليتي دوه السكر ،، ليش مخلصه دوه الضغط !!!! خابرتي الولد والبنية ،، شلونهم الجهال ،، ليش مديجون يمنه !!! لو يبدي ينق ، ادري هي صلاة عشه لو تراويح ، صارلج ساعة تصلين !!!! وين ال.... الريموت ،، خالته للتلفزيون على المسلسل التركي ، من انعل ابو مهند ! ومادري وين ضامته للريموت حتى منعرف شنو الاخبار وشكو شصار !!!
وعلى هذه الرنه يبقى المتقاعد يون وساعة مضيع مناظره وساعة مفاتيح البيت ،،الى ان فد يوم من النگره والاخبار ووجوه حسناوات السياسة وووو يصعد الضغط ٢٨/٢٢ ويطك ولو ينشل لو يموت ،،، وبف ، بف ، بف ،، ،، بم !!!
انفجرت الضفدعة وماتت ،،من قراءة الثاني ابتدائي قبل ٥٨ سنة !!!
تحياتي الى كل المتقاعدين السابقين واللاحقين اناثا وذكورا .

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

677 زائر، ولايوجد أعضاء داخل الموقع