حچاية التنگال ٢١١

                                                

                            د.سعد العبيدي

حچاية التنگال ٢١١

أگلك يگولون صايرة عركة بوكسات بين نواب من البرلمان.
أي شفتها منشورة، وتعال اشبع ضحك على التعليقات المكتوبة.
آني أختلف وياك، آني شبعت قهر على منظر العركة، وعلى السبب الي صارت من وراه العركة، وعلى نفسي الي انتخبت ناس يسوون عركة.
أگلك صدگ هي علويش صارت العركة؟.
الحچي الي تناقلته الناس، انو من دا يتقاسمون المناصب مال الدرجات الخاصة، اختلفوا الربع بيناتهم، وحچي يجر حچي، وتدري الدنيا صيف ودرجة الحرارة عالية، والكهرباء بدت تنگطع، فصعدت الحماوة وصارت العركة، وأكو واحد من المتعاركين من آل عربيد يگول سوء تفاهم بيني وبين نائب من آل النباعي فطرحته أرضاً وتركته.
اشلون يعني طرحه أرضاً؟... هو ليش آني يمهم حتى أشرح اشلون طرحه أرضاً، المهم طرحه أرضاً ورفسه رفساً وشبعه كتلاً وبس.
زين أنت يا رواية من الروايات الي نگالت تصدگها.
والله عقلي يگلي مو مسألة سوء تفاهم، لأن يوميه تصير آلاف من سوء التفاهم، إذا كل وحده تصير من وراها عركة، راح تصير دنياتنا سمرگدة، من هاي أگول اختلفوا على القسمة.
لعد بهاي الحالة، حسبتهم صارت حسبة الحرامية، من يروحون سوه يبوگون، ومن يبدون يقسمون البوگة يختلفون ويتكاتلون.
أگلك تره هاي غير بلوه ابتلينه بيهم.
وروح أبوك، مو صوچهم، صوچنه احنه الي انتخبنه عامي شامي.

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

628 زائر، ولايوجد أعضاء داخل الموقع