الى بغداد اهديها

ميسون نعيم الرومي


الى بغداد اهديها

بمناسبة يوم الشهيد العراقي*

چم ونـَّـه چم احاه صحتي (يبغداد)-

يوم الشهيد اليوم - يوميه ينعاد

***

بالك تدوس اهناك واتفزز الموت

تدمع أرض بغداد ما نسمع الصوت

***

ماتت الخاله ابساع من كثر ونهه
(عادل) وصل ملفوف - جابوا ابنهه

***

فرحانه كلهه الناس مابيهه مضيوم

بس انتِ يا(بغداد) يوم ارده من يوم

***

نص الشباب اتموت تحمي الكراسي

والشعب يدري زين .. ماضنه ناسي

***

ام العراق اتنوح تتحنـَّـه بالدم

يطحن ولدهه الموت يسگيهه بالسم

***

اجيال انفنت بحروب رعنعه اوغبيه

صار (العـرق) اليوم كلـَّه ســبيه

***

تِچـَّـبح تجوع اطفال نصهه يتامه

والشعب يلطم دوم طرگ الملامه

***

طاح (الصنم) بالگاع گلنه خلصنه

جانه الف (صدام) طشش ضعنه

***

متروسه كلهه اگبور ارضك يلعراگ

يوم اوتخضر اورود واتحاسب الباگ

---------------

الى بغداد اهديها بمناسبة يوم الشهيد العراقي المصادف في 1 / ديسمبر

----------------

1/ديسمبر/2018

ســــــــــــتوكهولم

 

الأبراج وتفسير الأحلام

المتواجدون حاليا

483 زائر، ولايوجد أعضاء داخل الموقع