الگاردينيا - مجلة ثقافية عامة - الى المتظاهرين اهديها ١- ٥

الى المتظاهرين اهديها ١- ٥

ميسون نعيم الرومي

الى المتظاهرين اهديها

بصرتنه اهتفت عاشت الحريه
انهض يا شعب ثورتك شعبيه
***
بصره اوكربله والكوت والسده
شبابچ هالنهض للظلم يتحده
***
يابابل زلم يا صوتهه الهادر
شبابك حنته من ثورة الثائر
***
ثورتك يا شعب كل ثورة الفقره
نتحده الظلم وانساند الثوره
***
بغداد الرشيد او حضن كل ثاثر
خل يسمع ابصوتچ حاكم اوجائر
***
ابذيقار ثوره والنجف ميسان
فاليحيا الشعب والموت للحيتان
***
فرصتك يا شعب انهض اوساندهم
شباب المنتفض هاليوم ثورتهم
***
وين ابن الرمادي الموصل الحدباء
هيت اوعانه راوه وبن سامراء
***
يا ام العراقي .. هلهلي الإبنچ
(سعد) ثار اورضع صرخاته من صدرچ
***
منريد القياده الجتــّي من ايران
افيون اوحشيشه اتوكل الشبان
***

اطلع ياشعب لتگول شعليه
-(الخضره)صفت بيت الحراميه
***
رجـّـع ثروتـك واتعيش متـنـَعـِم
(حاسب) كل سياسي اوحاسب وامعمم
***
عتموا ع الخبر حفنة قيادات
وابدمنه بنوا كومة محطات
***
ياابـن العراق اوثـورة العشـريـن
ثور اعله الظلم والظالم من اسنين
***
اجونه امن العدم حفاي نهابه
عَ الكرسي اگعدوا كومة الچذابه
***
محطات الإذاعه ساكته اشمالچ
محروگ الشعب ذكريه باخبارچ
***
نفطنه اوماينه متـْحـَـكـْمَه بي ايران
حكومتنه دغش يا كومة الغمان
***
افتوا يالمراجع هالحكم باطل
شبابك يالعراق اوع العمل عاطل
***
معروف العراقي صاحب الغيره
ما يقبل حنطته تاكل اشعيره
***
بفلوس الشعب سووا محطات
محتفلين بيها والشعب مات
***
عراق الخير شعبه منهتك جوعان
اويلي اعليه.. يتحسر البيتنجان
***
كاتلهم (الهبري) اللبس عَ الموده
اتسلطوا علينه .. ساعة السوده
***
يا دجلة الخير او هالفرات اوياك
يا شعب العراق الثورة تترجاك


الى المتظاهرين اهديها -٢-

دم الشباب ابرگبتك
يعبادي انت اوشلتك
***
فاليحيا الشعب فاليحيا ثوراه
فاليحيا العراق اوتشع انواره
***
النـت انگـِطع والفـيـس والحاســــوب
يعبادي (التدعي) وانت اصبحت مطلوب
***
شتفيد الكراسي الشعب هذا الثار
يالبعتوا الوطن للأجننبي والجار
***
انهضوا ياشباب اوصوتكم يعله
الكرخ اورصافه الشعب والشعله
***
شـو كلمن اجـه ويـريـد يـتـظاهـر
اعبادي اومالكي العامري اوعمار يتفاخر
***
محترف الچذب لعبادي يانهاب
تضرب بالرصاص اوتسجن الطلاب
***
لبيك العـراق اتـنادي تـطلب عـون
شعبك منتفض هالصوته هز الكون
***
ياصوت الشعب يالعالي وي الغيم
اطرد كل دخيل الضامك اويه الضيم
***
هذا الأگدره .. يعراقي روحي اوياك
ماتت فرحتي من فارگيت اسماك


المتظاهرين اهديها -٣-

ثورتنه ثوره شعبيه
لا سنيه اولا شيعيه
***
إذا اليوم الشعب ماحقق اهدافه
قريب اوينتفض واتثور اطيافه
***
فرق بين الحقوق اوبين اهدافك
الك كل الحقوق اوخير ثرواتك
***
منهج والقياده انريد للثوره
من هذا الشعب وابنخبه متنوره
***
المفروض كل حاكم شريف اويخدم ابشعبه
مو ينهب ثروته .. وامن الخمس نسبه
***
الثوره دوم اتدوم ماتخمد ابيوم
مو بردي اويگب واتزيد الهموم
***
(من ألفين واتلاثه) والشعب يعلف..
على هاذي الحكومه اوحلگ بس يلغف
***
يعبادي يالچذاب والوجه وجهين
يالكاتل الشبان..تاليهه ليوين؟
***
هذا مصيرك بان .. روح اقره تاريخ
الحكم ذمـَّـه اودين مو أكل بطيخ
***
احزاب السياسه اليوم مشغوله
بالكيكه الهمش..والناس مكتوله
***
يادم العراقي الرخص رخص المي
احكومتنا الطغت و(اخرعلاج الكي)
***
جوْعـَـتنـَه الحكومه اوعلمتنه الذل
اليحكم ظلم ... ينهزم لويختل
***
چم حفره تلم ياجوگة السراق؟
ليغركم الكرسي! اعراقنه ..اعراق


الى المتظاهرين اهديها - ٤ -


ياشرطي وابن الجيش لاتحمي خاين
ثـور اويه شـعبك ثـور بسـك تعايـن
***
ياشرطي وابن الجيش شعبك اخوتك
خليهه ايد ابإيـد عزز وجودك
***
كلهه تخلت ليش يعراقي عنـَّـك؟
هذا الشعب ذبحوه والحنه دمك
***
هيئة أمم چا وين؟وين القوانين
منسي شعبنه ليش بس بالعناوين
***
هذا العراق اصيح .. يا شعبي وينك؟
دجله اوفرات انباع محد يعينك
***
المالكي اومعصوم واعبادي والكل
هاذي القياده انزيح ع الكرسي متظل
***
الطائفية اتموت اطرد الخانك
وابساحة التحرير حقق مرامك
***
بالجمعه ثرنه الكل شيب اوشبابه
حقنه اونرجعه اليوم من هالعصابة
***
كل احنه ايد ابإيد بالجمعه نطلع
مانرضه بالترگيع (نشلع اونقلع)-
***
گضاهه بس بالنوم ريس العصابه
عين بناته اهناك حتى النسابه 

الى االثوار اهديها -٥-

إهدِروْ دمـَّـك ذول حكومة طواغيت
ع الكرسي وايگعدون .. واحنه ابتوابيت
***
باگــوه العــــــــراق اوكتـلوا اولاده
احزاب الخيانه التـِدْعي للديانه .. ابحجة الساده
***
كل الشعب ينخاك يا علي الكرار
تخسف الخضره ابذول هالكومة اشرار
***
موجوعه روحي اعليك والدمع يهمل
اشگد اوبعد چم دوب ياشعب تحمل
***
يا عيني العراقي امحسـر اومذبـوح
حصته امن النفط بس الهضم والنوح
***
شعب العراق اليوم حاير ابأمره
جوع اومذله اوضيم يلهم ابجمره
***
يا دم الشهيد اليحرگ الحكام
يا ثورة شعبنه التطرد الظلام
***
دمكم ياشباب انهدر واتطشر
(اعبادي) المدعي بس يخطب القشمر
***
امتثل للقانون .. حاسب السراق
مو بالحچي المعسول وابعزف الابواق
***
شعبنه ابن الحضارة منبع الأديان
ما يـرضه عبد ايصير واتحكمه ايران
-----------------------
23/تموز/2018
ســــــــــــــــتوكهولم

  

الأبراج وتفسير الأحلام

المتواجدون حاليا

604 زائر، ولايوجد أعضاء داخل الموقع