حچاية التنگال ٦٤

                                                         

                                   د.سعد العبيدي

أفراح شوقي إنخطفت من بيتها بليل أظلم.
طلعلك واحد وگال لا يابه لا، طلعت تمشي ويه المختطفين برهاوه وبليله گمريه ودليلي ركبت وياهم بسيارتها التورن.

نب الثاني وگال يمعودين تره كل الموضوع كلاوات هي وجماعتها مرتبينها تريد يسوولها لَمْ شمل برجلها اللاجئ بفلندا.
جاك ثالث وگال تره المختطفين لابسين عسكري وإجوي بتلث سيارات بيكب بلا أرقام.
الرابع گاعد بصفه ما فوت الفرصه وگال لا، بس سيارتين وشافوها جماعه من أهل المنطقه بيها أرقام لكن مغطيها بإصخام.
وجرّتْ السالفه وكبرت وزين تكبر فصارت الأمم المتحدة تناشد. أمريكا تطالب. فرنسا تتوسل. العرب نص شامتين ونص متأسفين، العراقيين يتظاهرون وحقهم يتظاهرون، ووياها إشتغلت الاتهامات حتى تاهت ووين واحد ينطي وجهه.
وطلعت أفراح والحمد لله.
ورجعنا مثل ما بدينا واحد يگول رجعت بسيارتها ولا چن المقدر صاير
والثاني يگول يابه شوفوا وجهها مخطوف والثاث گال من گد التعذيب، والرابع گال چانت يم أصدقائها. ولمن البنية گالت حققوا وياي وطلعت براءه.
طلعولك نفس الجماعه ها مو گلنه مليشيات شوفوا هي الي حققت وياها.
الثاني ليش تضلون بهذا العقل وربكم عصابات.
الثالث أبداً مو هيچي الحچي والعباس ماكو غير جهه حكومية وهي الي حققت وياها وشوفوا اذا ما بعد چم يوم طلعت للأردن واسمعوا التصريحات.
بالله عليكم هذا الحچي يخلي الواحد يفتهم شي، بلاكن بالنسبه الي استفاديت، لأن اسنين أدور على سؤال محيرني والي هو:
ليش احنه العراقيين من نسأل نگول شكو ماكو.
والحمد لله بعد اختطاف أفراح شوقي ياله افتهمت كلشي ماكو.

  

إذاعة وتلفزيون‏



أفلام من الذاكرة

الأبراج وتفسير الأحلام

المتواجدون حاليا

615 زائر، ولايوجد أعضاء داخل الموقع