الگاردينيا - مجلة ثقافية عامة - لـَـطـُــمْ حـَـدّادي

لـَـطـُــمْ حـَـدّادي

ميسون نعيم الرّومي

فِـدْوَه اسْـمَعْ سـؤالي ... عَمّي العبادي
مواطِــنْ بالعِــراق .. اوأسـألكْ عـادي
 
ابطرگْ القـَـميصْ اطلعتْ وابـْـروحي
يا شـوغـَة لـَهـِفـْـتي الشـَعْـبي وابْلادي
 
حِـزبـَـكْ هِـجـَمْ كلْ البَـلـَدْ ما ضَلْ بَعَدْ
مامِـشْ گـَـبـرْ لـَـمْ الأهـَـلْ واجـْـدادْي
 
سـرّاقْ حِـكـْـمَوْ هالبـَـلـَـدْ
مـنـْهـمْ عَـرَبْ واكـْـرادي
 
لاشغـلْ عِـدْنـَه اولاعَـمَلْ
نـلـْطـمْ لـَـطـًــمْ حـَــدّادي
 
ما يـرْضَه آلِـحـْـسـيـَـنْ اوْعـَـلي
لاالحَسَنْ يرضه اولا الإمام الهادي
 
رادَوْ ارجـالْ امْحَـزّمَـه
شـجْـعانْ كِـلهَـه اشدادي
 
تـِـبْـني اوتِـعَـمّرْ تـنـتفض
مو بـَــس بَــچي بالـْـوادي
***
فدوه اسمع سؤالي عمّي العبادي
الحزبك تمثله ! لو تمثل اعراقي
 
الـْـباگ يمته اتحاسبه
يا مكـْـثــَـر الـْسرّاقِـي ؟
 
تحكم او تقضي بالعـَـدل
هذا الك ذاك إلي هالباقي
 
أديان عِـدنه امعـَـدّده
كلهم يعـَـمـّي ارفاقِـي
 
حَچـْـيـَه حكم گايل (علي)
زمْرة شِــقاق ... انفاقي
 
صرخن حَـراير يا (علي)
بـــاعـوهِـــن ابـْـأسواقِـي
 
راحت زلم واتـْـذبحَّــت
لا رحـْـمَه ... لا اشفاقي
 
أطفــال ماتـَـت وانسبـَـت
وين العـَــدل يـَـعـْـراقي ؟
***
فِــدوه اسْـمع سؤالي ... عـَـمّي (الـِـعـْـبادي)
محسوب انت اعله العلم ! لازم اوبيه اتنادي
 
تحمي الشعب من العـطش
يـشـرب مـذلـَّـــه ابطاسه ؟
 
تبني اوتِـعمـّر من صدگ
لو كِـــتبـَــه عَ الكِـــرّاسه ؟
 
جـِـيرانـَّــه كلهم دغـَـش
بلعـَــو بَــلدنه اوساسَــه
 
نهران باگوهَـه اوأرض
للــبَــلد ! صارَوْ راسَــه
 
توگـَــف صَـلـِــب .. ما تِـنحرف
جدّك ينصفك ! يـِـمِّــتَه اوعَـبّاسَه
 
إخدم ابشـَـعبَكْ .. تىِـنـِـصِـر
تـــاريخ بـِــيه الـْــماسـَــــه
 
قانـون كل حاكِــم مـُــضَـه
ما يحمي كرسي الــْـساسّـه
 
والشعـَـب كله هالهتـَـف واينادي
فدوه اسمع سؤالي عمي العبادي
مواطن بالعراق اوأسألـَـك عادي

آب / 2014
ســـتوكهولم
 

الأبراج وتفسير الأحلام

المتواجدون حاليا

396 زائر، ولايوجد أعضاء داخل الموقع