الگاردينيا - مجلة ثقافية عامة - أضافيرَكْ لا تگرط ْ..عيب

أضافيرَكْ لا تگرط ْ..عيب

 

ميسون نعيم الرومي

لا بيه نَـفع اولا بيه فودْ
طايح حايطنه اومربود

إيذري اترابَه دومه ايهيل
اشبعنه اتراب اوماكو اورود

عذبْـتـونَـه كومَـه اسنين
إمْـطينَـه ابطين اوكلهن سود

يادَمع اليهمل وايسيل
يا ضيم الروح المچبود

گليَـبْ المَتعوب اومَجروحْ
ابدربه الرايح ماله اردود

مات الزرع او شَحْ الماي
لا ضل حاصد لامحصود

ضاعَـتْ شبان اوياحيف
راحت زهره او راح اسعود

يا وطن الخير المنهوب
مودَه اوهالصار الفَرهود

يعراقي اشجالك مَوجوع
شعبك مظلوم او مَنكود

نهرانك فاضتْ بالدم
  تاريخ امسجل مَشهود

يمشي او يحصد بينه الموت
ذبحوْ بالبيت الچادود

تاهت بالشارع أيتام
تاكل تشبع بَس اوعود

حكومتنه جوگة سراق
اشبعتو ..؟ كافي امن الفرهود

ظالم يحكم رايد دوم
لازگ بالكرسي اومشدود

نواب اوتكرف آلآف
امكرش واحدهم مَـلغودْ

جوعان الشعب اومَهـضوم
امخيطينه الحَلگه اومسدود

ملينه او هالصحنه الداد
لا ضل عـالم لا حَـداد

يانوري إقرَه التاريخ
لا تنسه .. اذكر عبود*

إصبع بالخشم ايفرّ
نَـقّـبْ عَ النفط المَوعودْ

أضافيرَكْ لا تگرط ْ.. عيب
تصوير إيصَوّرْ مَوجودْ

علگلك ام سبع اعيون
خافَـنَّـه يحسدك حاسود

لا بيه نَـفع اولا بيه فودْ
طايح حايطنه اومربود
***********
نيسان / 2014
ســــــــــــتوكهولم

http://www.youtube.com/watch?v=Waw_8W72Fis

 

الأبراج وتفسير الأحلام

المتواجدون حاليا

799 زائر، ولايوجد أعضاء داخل الموقع